Makron: Frantsııa Taıaý Shyǵysqa onǵa jýyq áskerı keme jiberýi múmkin
ASTANA. KAZINFORM — Frantsııa Taıaý Shyǵystaǵy odaqtastaryn qoldaý maqsatynda shamamen onǵa jýyq áskerı-teńiz kemesin, sonyń ishinde ushaq tasyǵysh kemeler tobyn Jerorta teńizine, Qyzyl teńizge jáne qajet bolǵan jaǵdaıda Ormýz buǵazyna jiberýi múmkin. Bul týraly Frantsııa prezıdenti Emmanýel Makron málimdedi, dep jazdy Reuters agenttigi.
Makron Kıprge sapary barysynda, demalys kúnderi shyǵys Jerorta teńizine kelgen «Sharl de Goll» ushaq tasyǵysh kemesine barar aldynda sóz sóılep, ótken aptada aralǵa baǵyttalǵan ushqyshsyz ushý apparattary ustalǵannan keıin kıprlik áriptesin tynyshtandyrýǵa tyrysty.
Pafos qalasynda Kıpr prezıdenti Nıkos Hrıstodýlıdıs jáne Grekııa premer-mınıstri Kırıakos Mıtsotakıspen kezdesýden keıin Makron:
– Kıprge jasalǵan kez kelgen shabýyl Eýropaǵa jasalǵan shabýyl bolyp sanalady, — dep málimdedi.
AQSh, Izraıl jáne Iran arasyndaǵy qaqtyǵys kúsheıip, oǵan Parsy shyǵanaǵyndaǵy arab memleketteri de tartylyp, al Iran qoldaıtyn «Hezbolla» qarýly toby Izraılge shabýyl jasaǵannan keıin Lıvan da soǵys aımaǵyna aınaldy. Soǵan qaramastan, eýropalyq memleketter bul qaqtyǵystan negizinen syrt qalyp otyr.
Alaıda Taıaý Shyǵystaǵy teńiz joldarynyń qaýipsizdigine baılanysty qıyndyqtar men munaı baǵasynyń bir barreli 100 dollardan asyp ketýi Eýropa elderiniń óz múddelerin qalaı qorǵaý kerektigi týraly máseleni kún tártibine shyǵardy.
Makronnyń aıtýynsha, Frantsııanyń maqsaty — qatań túrde qorǵanys pozıtsııasyn ustaný jáne Iran tarapynan qysymǵa ushyraǵan elderdi qoldaý arqyly óńirdegi shıelenisti azaıtýǵa yqpal etý.
– Bizdiń maqsatymyz — qatań túrde qorǵanys pozıtsııasyn saqtaý. Irannyń áreketterine jaýap retinde qysym kórgen barlyq elderdi qoldaı otyryp, olardyń bedelin nyǵaıtýǵa jáne óńirdegi shıelenisti báseńdetýge kómektesý. Túpki maqsatymyz — keme qatynasynyń erkindigin jáne teńizdegi qaýipsizdikti qamtamasyz etý, — dedi Makron.
Onyń aıtýynsha, bul jospardyń bir bóligi retinde Ormýz buǵazynda kommertsııalyq kemelerdi qorǵaý sharalary da qarastyrylyp jatyr.
– Qazirgi ýaqytta biz tek qorǵanys sıpatyndaǵy jáne tek eskorttyq mıssııa qurý baǵytyndaǵy joryqty josparlap otyrmyz. Bul mıssııa eýropalyq jáne eýropalyq emes memlekettermen birlesip daıyndalýy tıis. Onyń maqsaty — qaqtyǵystyń eń qarqyndy kezeńi aıaqtalǵannan keıin múmkindiginshe tezirek konteıner tasymaldaıtyn kemeler men munaı tankerlerin qorǵashtap, Ormýz buǵazy arqyly keme qatynasyn birtindep qaıta jandandyrý, — dedi Makron.
Degenmen ol bul josparǵa egjeı-tegjeıli toqtalǵan joq.
Aıta keteıik, buǵan deıin AQSh pen Izraıldiń Iranǵa qarsy soǵysynda qansha adam qaza tapqanyn jazdyq.
