Makron balalarǵa nelikten áleýmettik jelilerdi paıdalanýǵa tyıym salýdy usynady
ASTANA. KAZINFORM — Frantsııa prezıdenti Emmanýel Makron 15 jasqa deıingi balalarǵa áleýmettik jelilerdi paıdalanýǵa tyıym salý bastamasyn jarııalady. Eýropalyq basylymdardyń paıymynsha, bul usynys Frantsııada qoǵamdyq qoldaýǵa ıe bolyp, Makron úshin saıası upaı jınaýdyń tıimdi quralyna aınalýy múmkin.
Politico basylymy bul usynysty Makron úshin «saıası qural» dep sıpattap otyr. Sebebi bul bastama Parıjdiń kámeletke tolmaǵandardy ınternettegi pornografııalyq mazmunnan qorǵaý áreketterinen keıin jáne Frantsııadaǵy mektepterdiń birinde 14 jastaǵy oqýshynyń 31 jastaǵy mektep qyzmetkerin pyshaqtap óltirgen oqıǵadan soń kún tártibine qaıta shyqty. Qylmysta qoldanylǵan pyshaqtyń da áleýmettik jeli arqyly tabylǵany atap ótilgen.
Oqıǵadan keıin jergilikti telearnaǵa suhbat bergen Makron áleýmettik jelilerdi synǵa aldy. Ol Frantsııanyń Eýroodaqtyń áreketin kútýge ýaqyty joǵyn aıtyp, Brıýssel shuǵyl qadam jasamasa, eldiń jeke-dara áreket etetinin málimdedi.
Alaıda keıinirek bul isti tergep jatqan prokýror kúdiktiniń áleýmettik jelilerdi óte sırek paıdalanǵanyn, esesine qatygez beıneoıyndarǵa áýestigin aıtqan. Soǵan qaramastan, bastama qoǵamdyq jáne saıası alańda talqylanýyn jalǵastyryp jatyr.
Eýropalyq sholýshylar Makronnyń bul taqyrypty qoǵamdyq talqylaýǵa shyǵarýy onyń paıdasyna sheshilýi múmkin ekenin aıtady. Harris Interactive zertteý kompanııasynyń byltyrǵy saýalnamasyna sáıkes, frantsýzdardyń 73%-y áleýmettik jelilerge jas shekteý engizýdi qoldaıdy. Zertteýler de balalardyń ekran aldynda tym kóp ýaqyt ótkizbeýi kerektigin kórsetken.
Makronnyń burynǵy keńesshileriniń biri bul usynysty «barlyǵyn baqylaýda ustap otyr degen áser qaldyrý tásili» dep atady. Onyń aıtýynsha, eger bastama sátsizdikke ushyrasa, prezıdent ony parlamentke ysyra salady, al eger sátti iske assa, partııalyq saıasattan tys máseleler boıynsha kún tártibin ózi qalyptastyryp otyrǵanyn dáleldeı alady.
Makron ekinshi merziminiń basynan beri áleýmettik jeliler men ekrandar úshin jas shekteýin engizýge tyrysyp keledi. 2023 jyly 15 jasqa deıingi balalarǵa áleýmettik jelilerdi paıdalanýǵa tyıym salatyn zań qabyldanǵanymen, ol naqty júzege aspaı qaldy. Sebebi jas mólsherin tekserý máselesi tehnıkalyq turǵyda qıyndyq týdyrdy ári zań Eýroodaqtyń tsıfrlyq qyzmetter týraly zańymen qaıshylyqqa tústi.
2024 jylǵy sáýirde Elıseı saraıy qurǵan sarapshylar komıteti áleýmettik jeliler úshin 15 jasty resmı jas shegi retinde usyndy. Maýsym aıynda Makron bul usynysty iske asyrýǵa ýáde bergen edi. Alaıda kóp uzamaı ol parlamenttegi kópshilik qoldaýdan aıyryldy.
Makron jaqynda bul máseleniń mańyzdylyǵyn atap ótip, tez sheshim qabyldaý kerektigin aıtty. Degenmen Frantsııada kópshilik ony birden áreket etedi dep kútpeıdi.
Fondation pour l’Enfance balalar quqyǵyn qorǵaıtyn úkimettik emes uıymynyń zańgeri Politico basylymyna bergen suhbatynda: «Makronnyń komandasy kóbine naqty sharalarmen emes, tek málimdemelermen shekteledi», – dedi.
Prezıdent keńsesi aldaǵy aptalar men aılarda balalardyń ekran aldynda ótkizetin ýaqytyn shekteý jáne áleýmettik jelilerdi paıdalaný erejelerin kúsheıtý boıynsha birneshe otyrys ótkizýdi josparlap otyr.
Aıta keteıik, Emmanýel Makron bıylǵy maýsymda 15 jasqa deıingi balalarǵa áleýmettik jelilerdi paıdalanýǵa tyıym salatynyn resmı túrde málimdegen bolatyn.