Makron armııany nyǵaıtý úshin jas eriktilerdi tartpaqshy

ASTANA.KAZINFORM — Frantsııa prezıdenti Emmanýel Makron armııany nyǵaıtýǵa erikti túrde kóbirek jastardy «jumyldyrý» josparyn aıtty. Qarýly kúshterge arnaǵan dástúrli jańajyldyq joldaýynda Frantsııa prezıdenti eldiń jańa qaýip-qaterlerge beıimdelýge májbúr ekenin basa aıtty. Atap aıtqanda, ol álemniń keıbir elderinde jańa, «qater tóndiretin» ıadrolyq doktrınanyń qabyldanǵanyn atap ótti, dep habarlaıdy Radio France.

Frantsýz kóshbasshysynyń aıtýynsha, Eýropaǵa «strategııalyq oıaný» jáne qorǵanys salasynda AQSh-tan kóbirek táýelsizdik qajet. Donald Tramp tusynda AQSh-tyń eýropalyq odaqtastarynan alshaqtaý qaýpi aıtarlyqtaı artady.

Makron sonymen qatar Ulttyq strategııalyq sholýdy mamyr aıyna deıin jańartýǵa shaqyrdy. Bul qujat ulttyq jáne halyqaralyq qorǵanys jáne qaýipsizdik sektoryna sholý jasaıdy jáne Frantsııanyń taıaý jyldardaǵy strategııalyq jáne operatsııalyq qıyndyqtaryn anyqtaıdy.

Osy turǵyda Prezıdent frantsýz qarýly kúshterin jańa jas eriktilermen nyǵaıtýǵa nıetti ekenin málimdedi. Ol úkimet pen Bas shtabtan mamyr aıyna deıin «erikti jastardyń qarýly kúshter qatarynda jattyǵyp, qatarlaryn nyǵaıtýǵa múmkindik berý» týraly usynystar engizýdi talap etti.

— Frantsııada mindetti áskerı qyzmetti qaıtarý joq. Biz eriktilerdi jaqsyraq anyqtaýymyz kerek», «olardy oqytyp, qajet bolsa, „Frantsııa astanasynda jáne basqa jerlerde“ qarýly kúshterdi nyǵaıtý úshin jumyldyra bilýimiz kerek, — dep túsindirdi prezıdent.

Onyń aıtýynsha, áńgime kásibı armııaǵa «kómek kórsetý úshin» qurylǵan rezerv týraly bolyp otyr. Memleket basshysy «Áskerı josparlaý týraly» zańda 2035 jylǵa qaraı qyzmettegi árbir eki áskerı qyzmetkerge bir rezervıst daıarlaý, ıaǵnı 100 myń adamdyq armııa rezervin qurý kózdelgenin eske saldy.

Eske sala keteıik, buǵan deıin Frantsııa jańa úkimetiniń quramy belgili bolǵanyn jazǵan bolatynbyz.