Makron AQSh-tyń Eýropaǵa qatysty kez kelgen baj salyǵyna áreket etýge daıyn

ASTANA.KAZINFORM - Frantsııa prezıdenti Emmanýel Makron AQSh-tyń eýropalyq taýarlarǵa baj salyǵy Amerıkada ınflıatsııanyń ósýine ákeletinin eskertti, dep habarlaıdy Kazinform-nyń menshikti tilshisi.

Makron Kanada, Meksıka jáne Qytaıǵa baj salyǵyn engizgen Donald Tramptyń qoqan-loqqylarynan keıin EO AQSh úshin «basty basymdyq» bolmaýy kerek ekenin málimdedi.

— Sizdiń birinshi problemańyz Eýropalyq odaq pa? Joq, men olaı oılamaımyn. Sizdiń birinshi máseleńiz – Qytaı, sondyqtan siz birinshi máselege nazar aýdarýyńyz kerek, - dedi Emmanýel Makron.

Frantsýz kóshbasshysy ekonomıkalyq baılanystar deńgeıin eskersek, baj salyqtary Eýropa elderi, sondaı-aq AQSh ekonomıkasyna aıtarlyqtaı zııan tıgizetinin eskertti.

— Eger siz kóptegen salaǵa baj salyǵyn engizseńiz, bul AQSh shyǵyndaryn arttyryp, ınflıatsııa týdyrady. Sizdiń qalaýyńyz osy ma? Men buǵan senimdi emespin, - dedi Frantsııa prezıdenti.

Makron EO AQSh-tyń áreketterine jaýap berýge daıyn bolýyn, biraq 27 elden turatyn blok aldymen «táýelsiz áreket etýi kerektigin» jáne «eger baj salyǵyna qatysty másele týyndasa, talqylap, birge sheshetindigin» aıtty.

Donald Tramp 1 aqpanda Brıýsseldi Vashıngtonǵa ádiletsizdik jasady dep aıyptap, eýropalyq taýarlarǵa ımporttyq baj salyǵyn engizetinin málimdedi.

Buǵan deıin Qytaıdyń Saýda mınıstrligi 10 aqpannan bastap AQSh-tyń birqatar taýaryna qarsy baj salyǵyn engizetini habarlanǵan bolatyn.

AQSh sondaı-aq bolat pen alıýmınıı ımportyna baj salyǵyn engizbekshi.

Makron men Sholts Eýropa úshin jańa baǵyt qurýdy josparlap otyrǵany týraly jazǵan edik.