Makkartnı jeke oryndaýyndaǵy áýen jazbalaryn táýelsiz belgimen qaıta shyǵarmaq
ASTANA. Sáýirdiń 21-i. QazAqparat - Áıgili «Bıtlz» (The Beatles) toby quramynyń múshesi ser Pol Makkartnı taıaýda óziniń búkil jeke oryndaýyndaǵy ánderiniń dıskiler toptamasy men albomdaryn táýelsiz Concord Music Group áýendik belgisimen qaıta jazyp shyǵaratynyn málimdedi.
Reuters agenttiginiń habarlaýynsha, dańqty sazger óziniń jeke oryndaýlar toptamasyn qaıta shyǵarýǵa, onyń burynǵy áriptesi, dybys jazatyn EMI kompanııasymen shyǵarmalaryn lıtsenzııalaý merzimi bitýi sebebinen baryp otyr. Qaıta basyp shyǵarý jaıyndaǵy jańalyq Makkartnıdiń tuńǵysh jeke albomy jaryq kórgenine 40 jyl tolýymen tuspa-tus kelip otyr.
Jaı ǵana "McCartney" dep atalǵan, tizimine "Maybe I'm Amazed", "Junk" jáne "Every Night" tárizdi tanymal ánder kirgen sol plastınka 1970 jylǵy sáýirdiń 17-sinde saz súıermenderiniń qolyna tıgen edi jáne áıgili lıverpýldik tórttiktiń resmı taraýymen este qalǵan bolatyn.
Makkartnı buǵan deıin de televızııalyq prodıýser Norman Lır negizin qalaǵan jáne áýel basta djaz ben jeke oryndaýshylar ónerin jazyp-taratýǵa mamandanǵan Concord Music Group kompanııasymen áriptestikte bolǵan edi. Dańqty eks-bıtl sazgerdiń "Memory Almost Full" (2007) jáne "Good Evening New York City" (2009) sııaqty sońǵy stýdııalyq jáne kontserttik dıskileri naq osy Concord Music Group ózi tárizdes taǵy bir ujym Starbucks korporatsııasymen birlesip taǵaıyndaǵan Hear Music belgisimen shyǵarǵan.
Qaıta jazyp shyǵarý kezeginde Makkartnı men taǵy da bir tanymal top Wings oryndaýyndaǵy 1973 jylǵy "Band On The Run" klassıkalyq albomy birinshi bolyp tur.
Al, The Beatles tobynyń áýendik jazbalaryna qatysty aıtar bolsaq, olardy shyǵarý quqy ázirge EMI kompanııasynyń quzyrynda qala beredi. Byltyr bul kompanııa 13 mıllıonnan astam dana taralymmen satylyp ketken lıverpýldik tórttiktiń búkil katalogyn zor tabyspen qaıta jazyp shyqqan bolatyn.
