Makınskidegi qus fabrıkasynda órt boldy - Aqmola oblysy
KÓKShETAÝ. QazAqparat - Bulandy aýdanynda qus fabrıkasy ǵımaratynda órt boldy, dep habarlaıdy Aqmola oblysy Tótenshe jaǵdaılar departamentiniń baspasóz qyzmeti.
«Bulandy aýdanynyń órt sóndirýshi-qutqarýshylaryna b úgin saǵat 17:34-te Makınsk qus fabrıkasynyń №7 ǵımaratynda órt bolǵandyǵy týraly habar tústi. Órt sóndirýshilerdiń jedel is-qımyldarynyń arqasynda 800 sharshy metr aýmaqtaǵy órtti 43 mınýtta sóndirip, órttiń kórshiles ǵımarattarǵa taralýyna jol berilmedi» delingen vedomstvo taratqan habarlamada.
Órt kezinde ǵımarattyń bos bolǵandyǵyn jáne qustardyń zardap shekpegendikterin atap ótken jón. №7 ǵımarattyń jalpy aýdany 1930 sharshy metrdi quraıdy, zardap shekkender men jaraqat alǵandar joq.
Málimetke saı, órt 18:04-te oqshaýlanyp, 18:18-de sóndirildi. Órt ornynda 10 órt sóndirýshi-qutqarýshy, Makınsk qus fabrıkasynyń 7 jáne memlekettik emes órtke qarsy qyzmetiniń 3 qyzmetkeri jumys istedi.
Órttiń sebebi anyqtalyp jatyr.
