Makınsk turǵyny 42 jastaǵy áıeldi basynan balǵamen uryp óltirdi
KÓKShETAÝ. QazAqparat – Aqmola oblysyndaǵy Makınsk qalasynyń turǵyny 42 jastaǵy áıeldi balǵamen uryp óltirdi, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, 2020 jylǵy qazannyń 9-da Bulandy aýdandyq PB kezekshi bólimine aýdandyq aýrýhananyń felsheri telefon arqyly habarlasyp, «qaraǵus tusynan bas súıeginiń ashyq synyǵy» dıagnozymen Makınsk qalasynyń turǵyny, 42 jastaǵy áıeldiń jetkizilgenin aıtqan.
Jedel-tergeý toby áıeldiń jaqynda satyp alǵan úıde er adammen jáne onyń ákesimen - úsheýi birge turǵanyn anyqtady.
«Qylmys bolǵan kúni keshke olardyń úıine Makınsk qalasynyń turǵyny kelgen. Er adam osyǵan deıin bul úıdi onyń týysqany jaldap turǵanyn, bular úıdi satyp alý arqyly ony baspanasynan aıyrǵanyn aıtyp, narazylyǵyn bildirgen. Keıin olar daýdy spırttik ishimdik arqyly sheshpek bolǵan. Araq ishkennen keıin ákesi men birge turatyn áıel óz bólmesine ketken. Eki er adam qosylyp, araq ishýin odan ári jalǵastyra beredi. Arada biraz ýaqyt ótken soń «qonaq» as bólmeden shyǵyp, basqa bólmege kiredi. Odan shyǵyp qolyndaǵy balǵasymen úıden shyǵyp, ketip qalady. Ol shyǵyp ketken kezde er adam jatyn bólmege barady. Onda edende qan josa bolyp jatqan áıeldi kórip, jedel járdem shaqyrady» dedi vedomstvodan.
Jedel-izdestirý sharasy barysynda kúdikti, Makınsk qalasynyń buryn sotty bolǵan 26 jastaǵy turǵyny ustaldy. Bastapqyda er adam óziniń qylmysqa qatysy joqtyǵyn aıtqanymen keıin zardap shekken áıeldi basynan urǵanyn moıyndady.
Qazirgi kezde kúdiktiniń ústinen Qylmystyq kodeksiniń 99-baby boıynsha is qozǵalyp, sotqa deıingi tergeý amaldary júrgizilip jatyr.
