Makınsk komandasy «Aq bıdaı» spartakıadasynyń jeńimpazy atandy - Aqmola oblysy
KÓKShETAÝ. QazAqparat - Aqmola oblysy Bulandy aýdanynyń Novobratskoe aýylynda jazǵy aýdandyq «Aq bıdaı» spartakıadasy óz máresine jetti jáne bıylǵy jyly dástúrli spartakıada «EKSPO-2017» Halyqaralyq mamandandyrylǵan kórmesine arnaldy, dep habarlaıdy «QazAqparat» tilshisi.
Aýdan əkiminiń baspasóz qyzmetiniń məlimeti boıynsha, keń kólemdegi aýdandyq is-sharaǵa aýdan ákimi Qýandyq Ispergenov, Egindikól aýdanynyń ákimi Narıman Tólepov, aýdandyq máslıhattyń hatshysy Shahman Qusaıynov, oblystyq jáne aýdandyq máslıhattardyń depýtattary, memlekettik mekemelerdiń jáne aýdan ákimi apparaty bóliminiń basshylary, eńbek ardagerleri, qoǵamdyq uıymdardyń ókilderi, jastar qatysty.
Spartakıadanyń resmı ashylý rásimi bastalmas buryn aýdan ortalyǵynan kelgen qonaqtar Novobratskoe aýylyndaǵy soǵys jyldary qaza bolǵan jaýyngerlerge arnalǵan eskertkishke gúl shoqtaryn qoıyp, taǵzym etti. Eskertkish basynda eske alý sózderimen aýdandyq ardagerler keńesiniń tóraıymy Kúlán Seıdahmetova sóz sóılep, osyndaı ıgi bastamalarǵa qatysyp, maıdangerlerge degen qurmet kórsetip júrgen jandarǵa alǵys aıtty.
Jazǵy spartakıadanyń ashylý saltanaty jańa salynǵan stadıonda ótti. Aýyldyq stadıonnyń qurylysyna aýdandyq bıýdjetten 15 mıllıon teńge qarajat bólingen.
Ashylý saltanatynyń aıasynda aýdan ákiminiń alǵys hatymen jáne estelik syılyqtarmen agrarlyq salasynyń ozattary, aqparat jáne baılanys, sport jáne mádenıet salasynyń qyzmetkerleri marapattaldy.
Aýdandyq jazǵy spartakıada kelesi sport túrleri boıynsha ótti: fýtbol, voleıbol, shahmat, doıby, otbasylyq starttar (jazǵy keshen), jazǵy prezıdenttik kópjarys, armrestlıng, gir tasyn kóterý, ústel tennısi, darts, at sport saıystary (alaman báıge - 15 shaqyrym, toq báıge - 7 sh., jorǵa - 6 sh., bulandylyq jarys - 5 sh., jelisti jylqy jarysy - 1 600 m.), qazaqsha kúres - absolıýt.
Spartakıadaǵa «SHP Novobratskoe» JShS demeýshilik jasady. Seriktestikti basqaryp otyrǵan Sultanbek Qaıyrbekuly Quljanov at báıgesine 2 mıllıonnan astam qarajat bólse, basqa sport túrleriniń jeńimpazdaryna 350 myń teńgege astam syılyq tapsyrdy.
Sporttyq is-sharanyń sońynda jarys túrleriniń jeńimpazdary dıplomdarmen, kýboktarmen jáne baǵaly syılyqtarmen marapattaldy. Jalpykomandalyq esep boıynsha «Aq bıdaı» jazǵy aýdandyq spartakıadasynyń jeńimpazy Makınsk qalasynyń komandasy atandy, ekinshi oryndy Jýravlevka aýyldyq okrýginiń komandasy ıelendi, úshinshi oryndy Kapıtanovka aýyldyq okrýginiń komandasy enshiledi.
