Makgregor-Meıvezer aıqasyna 3360 gaýhar tasty belbeý ázirlendi
ASTANA. QazAqparat - Dúnıejúzilik boks keńesi (WBC) amerıkalyq boksshy Floıd Meıvezer men ırlandııalyq MMA sheberi Konor Makgregor arasyndaǵy jekpe-jek jeńimpazyna arnalǵan arnaıy qurmet syılyǵyn ázirledi.
Uıymnyń resmı saıtynyń habarlaýynsha, «baǵaly belbeýdiń» ázirlenýine bir jarym keli 24 qaratty altyn, sondaı-aq 3360 gaýhar tas, 600 jaqut jáne 160 zúmiret tas qoldanylǵan. Belbeýdiń ózi qoltyraýyn terisinen ázirlenip, jasyl túske boıalǵan.
Bul Floıd Meıvezerdiń qatysýymen ótetin aıqasqa daıyndalyp turǵan alǵashqy arnaıy marapat emes. Fılıppındik Mennı Pakıaoǵa qarsy jekpe-jektegi jeńisinen keıin amerıkalyq boksshy 1 mıllıon dollar turatyn «zúbárjat belbeý» ıelengen bolatyn.
