Makedonııada Astana memlekettik qyzmet habynyń konferentsııasy ótti
SKOPЬE. QazAqparat - Makedonııanyń Skope qalasynda «Memlekettik qyzmet salasynyń zamanaýı syn-tegeýrinderi jáne sheshimderge qol jetkizýdegi seriktestiktiń róli» atty konferentsııa ótti. Atalmysh sharany Astana memlekettik qyzmet haby Makedonııa Respýblıkasynyń Aqparattyq qoǵam jáne ákimshiliktendirý mınıstrligimen áriptestikte uıymdastyrdy, dep habarlaıdy QazAqparat.
Konferentsııaǵa 16 eldiń, atap aıtqanda Astana habynyń qatysýshy elderi - Ázerbaıjan, Armenııa, Belarýs, Bosnııa jáne Gertsegovına, Grýzııa, Makedonııa, Qazaqstan, Qyrǵyzstan, Polsha, Tájikstan, Ózbekstan, Ýkraına, Chernogorııa, sondaı-aq Albanııa, Kosovo jáne Serbııanyń memlekettik qyzmetkerleri, sarapshylary men ǵalymdary qatysty.
«Konferentsııa Astana habynyń qatysýshy elderimen áriptestikti keńeıtýge tamasha múmkindik berdi. Biz habty memlekettik qyzmet salasyndaǵy seriktestikti nyǵaıtýǵa jáne tájirıbe almasýǵa qosqan úlesi úshin nátıjeli alań retinde joǵary baǵalaımyz», dedi Makedonııa Respýblıkasynyń Aqparattyq qoǵam jáne ákimshilik mınıstri Damıan Manchevskı sharany asha otyryp.
Óz kezeginde Astana memlekettik qyzmet habynyń Basqarýshy komıtetiniń tóraǵasy Álıhan Baımenov osy saladaǵy áriptestiktiń mańyzyn atap ótti.
«Búgingi jahandaný jáne jańa tehnologııalar damyǵan kezeńde azamattardyń memlekettik qyzmetterdiń sapasyna qoıylatyn talaptary úzdiksiz ósýde. Áriptestikti damytý memlekettik basqarý salasyndaǵy eń ozyq tájirıbelerdi anyqtaýǵa jáne týyndaǵan qıyndyqtardy sheshýge múmkindik beredi. Buǵan qosa, áriptestik turaqty damý maqsattaryna qol jetkizýdiń negizgi faktory bolyp tabylady», - dedi Á.Baımenov.
Konferentsııada sondaı-aq Serbııa men Kosovo elderiniń memlekettik basqarý mınıstrleri Branko Rýzık pen Mahır ıAgkıler, Batys Balkan aımaqtyq memlekettik basqarý mektebiniń (ReSPA) dırektory Ratka Sekýlovıch, EYDU-nyń ókili Mıroslava Boryska jáne memlekettik qyzmet salasyndaǵy akademııalar men memlekettik organdardyń basshylary sóz sóıledi.
Qatysýshylar áriptestik, sondaı-aq memlekettik qyzmetti damytýdaǵy jahandyq jáne aımaqtyq úrdisterdi eskerý máselelerin, ár elge óz memlekettik júıelerin damytýda qolaıly sheshimderdi tabýǵa kómektesetinin atap ótti.
