Makedonııa qazaqstandyqtarǵa óz oqý oryndarynda bilim alýy úshin stıpendııalar bóldi
ALMATY. QazAqparat - Búgin Almaty qalasynyń ákimi Ahmetjan Esimov Qazaqstandaǵy Makedonııa Respýblıkasynyń Tótenshe jáne Ókiletti Elshisi Ilıa Psaltırovty qabyldady. Bul týraly Almaty qalasy ákiminiń baspasóz qyzmetinen habarlady.
Kezdesý barysynda qala basshysy Almatynyń elimiz boıynsha qarjy, ǵylym, týrızm ortalyǵy ekendigin jáne barlyq baǵyttar boıynsha birigip jumys isteýge qashanda ashyq ekendigin atap ótti.
«Makedonııa da - Qazaqstan sııaqty jas memleket. Sondyqtan da biz bir-birimizdi mádenı baılanystar arqyly keńinen tanyp, bilýge tıispiz. Sizderdiń baı tarıhtaryńyz bar, el turaqty damyp keledi. Almaty men Makedonııa arasyndaǵy taýar aınalymy jaqsy qarqynmen ósýde. Almatyda sheteldik ınvestorlar úshin barlyq jaǵdaı jasalǵan», - dedi Ahmetjan Esimov.
Óz kezeginde dıpmıssııa basshysy Makedonııa astanasy Skope qalasynda ornalasqan Qazaqstan-Makedonııa qaýymdastyǵynyń jemisti jumys istep jatqandyǵyn aıtyp, Almatyda uıymnyń ókildigin ashý jónindegi josparymen bólisti. Elshi sonymen qatar, Makedonııada qazaqstandyq azamattar úshin vızasyz tártip qalyptasqandyǵyn, al stýdentterge shákirtaqy qarastyrylǵandyǵyn jetkizdi.
Kezdesý sońynda mártebeli meıman birigip jumys isteýge yntaly ekenin aıtyp, 2022 jyly ótetin Qysqy Olımpıada oıyndaryn ótkizý quqyǵyn jeńip alýda Almaty qalasynyń ákimine tabys tiledi.
