«Maqat-Soltústik Kavkaz» magıstraldy gaz qubyrynyń ekinshi tarmaǵy iske qosyldy
Búgin Atyraý oblysy Maqat aýdanynda QazaqGaz oblys ákimdigimen birlese «Maqat-Soltústik Kavkaz» magıstraldy gaz qubyrynyń ekinshi tarmaǵyn (lýpıngin) iske qosty.
«Maqat-Soltústik Kavkaz» magıstraldy gaz qubyrynyń lýpıngi qurylysy» ınvestıtsııalyq jobasy Memleket basshysynyń Atyraý jáne Atyraý oblysy halqyn jáne iri ónerkásip oryndaryn, sonymen qatar elimizdiń energetıkalyq qaýipsizdigin arttyrý aıasynda júzege asty.
Lýpıng qurylysynyń jalpy somasy - shamamen 86 mlrd teńge.
Bul - ulttyq kompanııanyń «Samuryq-Qazyna» qorymen birge qolǵa alǵan ınvestıtsııalyq jobalarynyń biri.
«QazaqGaz» UK» AQ basqarma tóraǵasy Sanjar Jarkeshovtiń aıtýynsha, jobany júzege asyrý - óńir úshin asa mańyzdy áleýmettik jáne strategııalyq tapsyrma.
«Eń aldymen joba Atyraý oblysynyń energetıkalyq qaýipsizdigin qamtamasyz etýge baǵyttalǵan. Ekinshiden, senimdi jáne úzdiksiz gazben jabdyqtaýdy qamtamasyz etý, óndiristik obektiler men sharýashylyq júrgizýshi sýbektilerdi otynnyń ekologııalyq túrine – tabıǵı gazǵa kóshirý, halyqtyń ómir súrý jaılylyǵyn arttyrý, eńbek jáne turmys jaǵdaıyn jaqsartýǵa jasalǵan», – dedi Sanjar Jarkeshov.
Sonymen qatar, lýpıng qurylysy bir jelilik gaz qubyryn toqtatýǵa baılanysty tótenshe jaǵdaılardy boldyrmaýǵa, sondaı-aq Atyraý oblysyndaǵy «Ulttyq ındýstrıaldy munaı-hımııa tehnoparki» arnaıy ekonomıkalyq aımaǵyn úzdiksiz gazben jabdyqtaýdy qamtamasyz etýge múmkindik beredi.
Jobanyń tehnologııalyq syzbasyna sáıkes jobalyq qysymy 7,4 MPa «Maqat – Soltústik Kavkaz» magıstraldy gaz qubyry lýpınginiń jobalyq qýaty - jylyna 13,147 mlrd m3.
«Maqat-Soltústik Kavkaz magıstraldy gaz qubyry 30 jyldan beri paıdalanylyp keledi. Biraz tehnıkalyq máseleler boldy, aqaýlar tabyldy. Eger magıstraldy gaz qubyry isten shyǵar bolsa, halyq, oblystyń iri kásiporyndary gazsyz qalýy múmkin. Bizdiń oblys úshin jobanyń mańyzdylyǵyn eskersek, QazaqGaz dál ýaqytynda «Maqat-Soltústik Kavkazdyń ekinshi tarmaǵyn iske qosty. Bul Atyraý oblysy úshin áleýmettik mańyzy bar, ınvestıtsııalyq joba», – dedi oblys ákiminiń orynbasary Qaırat Nurtaev.
Maqat-Soltústik Kavkaz magıstraldy gaz qubyry 30 jyldan beri paıdalanylyp keledi.
Eger «Maqat-Soltústik Kavkaz» magıstraldy gaz qubyry kúzgi-qysqy jylytý maýsymy kezeńinde isten shyǵar bolsa, Atyraý qalasy men oblys turǵyndary, 400 myń halyq, sondaı-aq, iri ónerkásip oryndary men balabaqsha, mektep, aýrýhanalar men basqa da nysandar gaz, sý, jylýsyz qalyp, óńirde energetıkalyq kollaps týady.
Іshki energetıkalyq qaýipsizdikti qamtamasyz etýde «Maqat-Soltústik Kavkaz» magıstraldy gaz qubyrynyń strategııalyq mańyzdylyǵyn, sonymen qatar, qubyrlardyń búgingi jaı-kúıin eskerip, QazaqGazdyń enshiles kásiporny «Intergaz Ortalyq Azııa» AQ «Maqat-Soltústik Kavkaz» MG 0-13 shaqyrymy ýchaskesinde lýpıng qurylysyn júzege asyrdy.
