MAQAT SAǴANASY
sp;Maqat saǵanasy - sáýlet óneri eskertkishi. Qaraǵandy oblysy Ulytaý aýdanynyń Sheńber aýylynan soltústik-batysqa qaraı 10 shaqyrym qashyqtyqta, Qaratorǵaı ózeniniń jaǵasynda Maqat Sarjanulyna arnap turǵyzylǵan.
Eskertkishtiń syrtqy aýdany 5,5h5,6 metr, jalpy bıiktigi 6 metr, qurlysyna kólemi 26h12h7 sm bolyp keletin kirpishter paıdalanylǵan. Syrtqy buryshtary men qabyrǵa jıekteri kirpishti jartylaı doǵal qalaý arqyly shyǵyńqy baǵanamen órilgen.
Konýs tárizdes kúmbezi dóńgelek negizdiń ústinde ornatylǵan. Bas qasbeti «P» pishindes beldeýmen sándelip, ortasynan doǵaly kireberis esik shyǵarylǵan. Úsh qabyrǵasy kilem oıýyna uqsas, «S» tárizdi órnekpen ásemdelgen. Negizgi qasbettiń ishki qabyrǵasyna saty ornatylǵan. Dáliz arqyly satymen 1 metr tereńdiktegi qabirge túsýge bolady. Onyń esigi shymyldyqpen jabylady. Áıel men er adamǵa arnalǵan eki qabirdiń (ólshemi 1,5h2,2 metr) buryshtarynda sharshy pishindi (ólshemi 0,6h0,6 metr) sańylaý qaldyrylǵan. Esik aldyndaǵy saǵanada úsh qulpytas bar.
Maqat saǵanasy - Qazaqstan Respýblıkasy Úkimetiniń 2008 jylǵy 21 naýryzdaǵy № 279 qaýlysymen respýblıkalyq mańyzy bar Tarıh jáne mádenıet eskertkishteriniń memlekettik tizimine engizilgen.
Derek kózi:
Qazaqstan ulttyq entsıklopedııasy, 6 tom.
