Maqanshy men Abyraly qashan aýdan bolady – Abaı oblysy ákiminiń jaýaby

SEMEI. QazAqparat – Úrjar aýdanynyń quramyndaǵy burynǵy Maqanshy aýdany men Semeıdiń irgesindegi Abyraly óńirin qaıtadan aýdan etip qurý máselesi 1-2 aıdyń ishinde sheshilýi múmkin. Ortalyq kommýnıkatsııalar qyzmetiniń kóshpeli brıfıngisinde aımaq basshysy Nurlan Uranhaev osyndaı málimet aıtty, dep habarlaıdy QazAqparat tilshisi.

«Byltyr tamyz aıynda Úrjar aýylyna bardym. Sol kezde Maqanshy aýylynyń aqsaqaldarymen kezdestim. Olar «Qashan Maqanshy bólek aýdan bolady?» degen másele kótergen bolatyn. Men sol kezde aıtqanmyn. Eń birinshi máseleni zerttep, búkil qujattaryn Úkimetke jiberýimiz kerek. Sebebi ol qolma-qol sheshilmeıtin másele ǵoı. Biz osy jumysty istep, qujattardy jınap, Úkimetke jibergenbiz. Úkimet janynan qurylǵan jumys toby aınalysyp jatyr», - dedi ol.

Oblys ákimi Abyraly aýdany qaıtadan qurylsa, Semeıge qosylǵan aýyldy eldi mekenderdiń bári sol aýdanǵa jatqyzylatynyn aıtty.

«Abyraly boıynsha aıtsaq, byltyr burynǵy Abyraly aýdanynyń týmalarymen kezdestim. Olarǵa da «zertteıik, kóreıik» degendi aıtqanmyn. Sebebi sheshim qabyldaıtyn men emespin. Biraq búkil jumysty jasaımyz, daıyndaımyz. Men sizge jaýap bereıin. Jumys toby quryldy. Kishkene shydaıyq. Kóp bolsa 1-2 aıdyń ishinde sheshiledi. Biraq sizge mynany aıtqym keledi. Burynǵy Abyraly aýdanynda qazir kóp bolsa 4 myńǵa jýyq adam ǵana turady. Al 4 myń adammen aýdan ashylmaıtynyn bilesiz. Sondyqtan aýdan ashylyp jatsa, búkil Semeıge qaraıtyn aýyldyq eldi mekenderdi qosyp, burynǵy Jańa Semeı aýdany sekildi bir aýdan ashylady. Osyndaı jumys jasalyp jatyr», - dedi Nurlan Uranhaev.