Mahmýd Sabyrhannyń daýly jekpe-jegine tórelik etken qazylar jarystardan shettetilýi múmkin
ASTANA. KAZINFORM – Qazaqstandyq kásipqoı boksshy Madııar Áshkeev 2026 jyly Japonııada ótken Azııa oıyndarynda Mahmud Sabyrhannyń daýly jekpe-jegine tórelik etken qazylar aldaǵy týrnırlerden shettetiletinin málimdedi, dep habarlaıdy Sports.kz.
Madııar Áshkeev ulttyq qurama boksshylarynyń Azııa oıyndaryna daıyndyǵyna toqtalyp, AQSh-ta ótken oqý-jattyǵý jıynynyń nátıjeli bolǵanyn aıtty.
Onyń sózinshe, sportshylar bir jarym aı boıy tyńǵylyqty daıyndalyp, bapkerler belgilegen taktıkany tolyq meńgergen.
Áshkeev ásirese 55 kelige deıingi salmaqta óner kórsetken Mahmýd Sabyrhannyń daıyndyǵyn joǵary baǵalady. Alaıda fılıppındik Karlo Paalamǵa qarsy ótken jartylaı fınaldyq kezdesýde tóreshiler upaı esepteý kezinde qatelik jibergen dep esepteıdi.
– Mahmud bul jarysqa júz paıyz daıyn boldy. Ekinshi raýndta qarsylasynan bir upaı shegerildi. Mundaı jaǵdaıda raýnd 10:9 esebimen baǵalansa, upaı shegerilgennen keıin 9:9 bolýy kerek. Al Mahmud sol raýndta basym túskendikten, esep 10:8 bolýy tıis edi. Biraq tóreshilerdiń muny nege eskermegenin túsinbedim. Federatsııa basshysy Shahmurat Mútálip te osy jaǵdaıǵa nazar aýdaryp, qazylardyń kelesi týrnırlerden shettetiletinin aıtty, – dedi Madııar Áshkeev.
Ol tóreshiler sheshimine qaramastan, Mahmud Sabyrhannyń laıyqty óner kórsetkenin atap ótti.
Azııa oıyndarynda Mahmud Sabyrhan alǵashqy kezdesýinde ırandyq Mehdı Kazemıdi jeńdi. Odan keıin shırek fınalda Ońtústik Koreıa ókili Shın Djeennan basym tústi.
Alaıda jartylaı fınalda eki dúrkin álem chempıony fılıppındik Karlo Paalamǵa tóreshilerdiń bólek sheshimimen 2:3 esebimen ese jiberdi.
Osylaısha, qazaqstandyq boksshy 55 kelige deıingi salmaqta qola medal ıelendi.
Ázirge tóreshilerdi jarystardan shettetý týraly resmı sheshimge qatysty aqparat jarııalanǵan joq.
