Mahmud Sabyrhan: Tórehan ekeýimiz tarıhı jetistikke jetkimiz keledi
ASTANA. KAZINFORM — Anglııanyń Lıverpýl qalasynda World Boxing aıasynda ótip jatqan álem chempıonatynda búgin jeńis tuǵyrynan kóringen Mahmud Sabyrhan (55 keli) men Sanjar Tashkenbaı (50 keli) júldeleri jóninde pikirin bildirdi.
El quramasynan fınalda Mahmud Sabyrhan ıspanııalyq Rafael Losano Serranomen altyn júldeni sarapqa saldy. Jekpe-jek barysynda úsh raýnd boıy basymdyq tanytqan otandasymyz jeńis tuǵyryna kóterildi.
— Dúbirli dodaǵa attanar aldynda eki dúrkin álem chempıony bolýdy aldyma maqsat etip qoıdym. Álemdik básekege qatysýǵa menimen birge inim Tórehan da keldi. Biz bir úıden shyqqan eki álem chempıony degen ataqqa ıe bolǵymyz keledi. Áli tolyqqandy qýana almaı turmyn. Іnim jeńis tuǵyrynan kórinip jatsa, úlken tabys bolar edi. Qazaq eline, jankúıerlerge, otbasyma, bapkerlerge rızashylyǵymdy bildirgim keledi. Bul — bizdiń ortaq jeńisimiz, - dedi Mahmud Sabyrhan.
Mahmud Sabyrhan 2001 jyly dúnıege kelgen. Qazirge deıin 2023 jyly álem chempıony bolsa, 2021 jyly kúmis júldeger atandy. 2024 jyly Azııa chempıony ataǵyn jeńip alsa, 2022 jyly qurlyqtyq dodada ekinshi oryn aldy.
Al Sanjar Táshkenbaı (50 keli) fınaldyq básekede Mońǵolııa sportshysy Aldarhıshıg Battýlgany tize búktirip, qos dúrkin álem chempıony ataǵyn jeńip aldy.
— Álem chempıonatynda basshylyq, bapkerler, ata-anam, jankúıerler tarapynan erekshe qoldaý bolyp jatyr. Ásirese, sharshy alańǵa shyqqan sátten jankúıerlik etken otandastarymyzdyń qoldaýyn erekshe sezinemiz. Fınalda joǵary deńgeıde óner kórsettim dep oılaımyn. Qarsylasty bapkerim ekeýimiz syrttaı baqylap júrdik. Tájirıbeli qarsylastaryma daıyndyqty oqý-jattyǵý jıynynan bastadyq. Sol jasalǵan taktıka júzege asty, - dedi ol.
Sanjar Tashkenbaı 2003 jyly dúnıege kelgen. Qazirge deıin 2023 jyly álem chempıonatynda jeńis tuǵyryna kóterilse, 2022 jyly Azmıa chempıony atandy.
Endi keshki sessııada Tórehan Sabyrhan (70 keli) jáne Aıbek Oralbaı (90 keli), Alýa Balqybekova (51 keli), Aıda Ábikeeva (65 keli) Natalıa Bogdanova (70 keli) altynǵa talasady.