Mahmud Sabyrhan men Aıbek Oralbaı salmaq aýystyrdy

ASTANA. KAZINFORM – Bokstan Ammanda ótetin Azııa chempıonaty qarsańynda tanymal qazaqstandyq boksshylar salmaq aýystyrdy. Bul týraly Ulttyq olımpıada komıteti habarlady.  

Eki boksshynyń salmaq aýystyrǵany jóninde quramanyń bas bapkeri Qaırat Sátjanov málimdedi.  

«Azııa chempıonatyna eń myqty degen boksshylardy aparamyz. Qurlyq dodasy qarsańynda biraz boksshynyń salmaq dárejesi aýyspaq. 48 kelide Sanjar Táshkenbaı men Temirtas Júsipov, 51 kelide Sáken Bıbosynov pen Damır Ábdihalyqov arasynda ózara myqty atanǵan boksshylarǵa basymdyq beremiz.

Mahmud Sabyrhan da 54 kelide kúsh synap kóretinin aıtty. Serik Temirjanov 60 kelige, Aıbek Oralbaı +92 kelige aýysyp jatyr. Qamshybek ekeýin baqylaımyz, eger Qońqabaevtyń salmaǵy azdaý bop jatsa, 92 kelige túsirermiz. Munyń bári aldaǵy ýaqyttyń enshisinde. Salmaq boıynsha osyndaı jańalyqtar bar», - dedi bapker. 

Aıta ketelik, Parıj Olımpıadasynda Mahmud Sabyrhan 57 kelide, Aıbek Oralbaı 92 kelide synǵa túsken bolatyn. 

Eske salsaq, buǵan deıin qazaqstandyq boksshylar Ammandaǵy Azııa birinshiligine qatysatynyn habarlaǵan edik.