Mahmud Sabyrhan — Azııa chempıonatynyń qola júldegeri
ASTANA. KAZINFORM — Mońǵolııa astanasy Ulanbatyr qalasynda ótip jatqan World Boxing aıasyndaǵy 2026 jylǵy Azııa chempıonatynda 6 sáýirde Mahmud Sabyrhan (55 keli) qola júldeger atandy.
Qazaqstandyq bylǵary qolǵap sheberi jartylaı fınalda mońǵolııalyq Harhýý Bılgýýnsaıhanmen qolǵap túıistirdi.
Mahmud Sabyrhan — ulttyq qurama sapyndaǵy tájirıbeli boksshynyń biri. Qazirge deıin 2023, 2025 jyldary álem chempıony atansa, 2021 jyly kúmis júlde aldy. 2024 jyly Azııa chempıonatynda altyn alsa, 2022 jyly ekinshi orynǵa taban tiredi.
Al qarsylasy álem chempıonatynda shırek fınalǵa deıin jetken.
3 raýnd boıy otandasymyz qarsylasyna qysym jasaýǵa tyrysqanymen, tóreshiler 5:0 esebimen jeńisti Mońǵolııa boksshysyna berdi.
Aıta ketsek, budan buryn el quramasynan Baqyt Seıdish (70 keli) fınalǵa joldama alsa, Valentına Halzova (70 keli) qola júldeger atandy.
Endi el quramasynan tórt sportshy sharshy alańǵa shyǵady. Aldymen Nadejda Rıabets (80 keli) úndistandyq Pýdja Ranımen kezdesse, Dına Islambekova (80 keliden joǵary) ózbekstandyq Oltınoı Sotımboeva, Ertýǵan Zeınýllınov (65 keli) taılandtyq Býndjong Sınsırımen qolǵap túıistiredi.
Búgingi jarys kúninde sońǵy jekpe-jekti Tórehan Sabyrhan (70 keli) qytaılyq Peıchen Vanǵa qarsy ótkizedi.
Sondaı-aq elimizdiń erler quramasynan Orazbek Asylqulov (60 keli), Sabyrjan Aqqalyqov (75 keli), Nurbek Oralbaı (85 keli), Saǵyndyq Toǵambaı (90 keli), Aıbek Oralbaı (90 keliden joǵary), áıelderde Aıgerim Sáttibaeva (48 keli) jartylaı fınal joldamasyn sarapqa salady.
Qurlyqtyq dodada el quramasynan barlyǵy 13 boksshy jarysty jalǵastyrýǵa múmkindik aldy.
