Mahmud Abbas: Palestına ákimshiligi Gaza sektoryn tolyq baqylaýǵa alýǵa daıyn
ASTANA. KAZINFORM – BUU Bas Assambleıasynyń sessııasynda halyqaralyq dıplomatııa palestınalyq basshylyqtyń jańa málimdemesin tirkedi.
Palestına prezıdenti Mahmud Abbas beısenbi kúni Bas Assambleıaǵa jasaǵan úndeýinde Palestına ulttyq ákimshiligi (PUÁ) Gaza sektoryn basqarý men qaýipsizdikti qamtamasyz etý boıynsha tolyq jaýapkershilikti óz moınyna alýǵa daıyn ekenin, biraq bolashaqta oqshaý aımaqty basqarýǵa HAMAS-tyń qatysy bolmaıtynyn málimdedi.
Abbas óz sózin beınebaılanys arqyly aıtty, sebebi AQSh bıligi oǵan jáne delegatsııasyna Bas Assambleıa otyrysyna qatysýǵa vıza berýden bas tartqan.
Onyń aıtýynsha, Gaza sektorynda bılikti berý protsesi «bir memleket, bir zań jáne bir zańdy qaýipsizdik kúshi» qaǵıdatymen júzege asyrylýy tıis.
— Biz qarýly memleket qurýdy qalamaımyz, – dep atap ótti Abbas.
Palestına basshysy 2023 jylǵy 7 qazandaǵy HAMAS-tyń áreketterin, onyń ishinde beıbit turǵyndarǵa shabýyldar men adamdardy kepilge alýdy eske salyp, olardyń «Palestına halqy men onyń táýelsizdikke degen ádil kúresin bildirmegenin» aıtty. Ol Gaza sektory bolashaq Palestına memleketiniń ajyramas bóligi bolyp tabylatynyn taǵy da naqtylady.
Abbas óz úndeýinde soǵysty dereý toqtatýdy, Gazaǵa gýmanıtarlyq kómekti kedergisiz jetkizýdi, barlyq tutqyndar men kepildegilerdi bosatýdy, sondaı-aq oqshaý aımaqtan Izraıl áskerin tolyq shyǵarýdy talap etti.
Onyń aıtýynsha, PUÁ ýaqytsha ótpeli organdy basqarýǵa daıyn, ol BUU qamqorlyǵymen jáne arab pen halyqaralyq seriktesterdiń qoldaýymen jumys isteıtin bolady. Bul Gaza sektoryn Batys jaǵalaýmen birtutas ákimshilik aıasynda biriktirýge múmkindik beredi.
Palestına prezıdenti sondaı-aq halyqaralyq qaýymdastyqty palestınalyq halyqqa kórsetilip jatqan qoldaýdy antısemıtızmmen shatastyrmaýǵa shaqyrdy.
— Biz palestınalyq máselege qoldaý kórsetý men antısemıtızmdi aralastyrmaýdy talap etemiz. Bul bizdiń qaǵıdattarymyz ben qundylyqtarymyzǵa qaıshy, – dedi ol.
Abbas Palestınany jýyrda moıyndaǵan memleketterge rızashylyǵyn bildirip, PUÁ-niń AQSh prezıdenti Donald Tramppen, Saýd Arabııasymen, Frantsııamen jáne BUU-men 22 qyrkúıekte ótken «eki memleket» negizindegi sheshimdi qoldaǵan konferentsııada bekitilgen beıbit jospardy júzege asyrýǵa daıyn ekenin atap ótti.
Sózin qorytyndylaı kele, ol palestınalyq halyq qıraýlar men qurbandarǵa qaramastan, «óz jerinde tamyryn jaıyp qala beretinin jáne qırandylardan qaıta turyp, bolashaqty quratynyn» jetkizdi.
Aıta keteıik, Palestınany moıyndaǵan elderdiń sany 160-qa jýyqtady.