Mahambet jáne Inder aýdandarynda Jaıyq ózeniniń sý deńgeıi tómendegeni baıqaldy

ASTANA. KAZINFORM – Atyraý oblysynyń Mahambet jáne Inder aýdandarynda Jaıyq ózeninde sý deńgeıiniń tómendegeni baıqalady, dep habarlaıdy QR Tótenshe jaǵdaılar mınıstrliginiń baspasóz qyzmeti.

Alaıda, Atyraý qalasynyń ózinde tańǵy saǵat 8:00-den bastap gıdroposttarda belgi 2 sm-ge artyp, 597 sm-ge kóterildi. Osyǵan baılanysty Tótenshe jaǵdaılar mınıstri Shyńǵys Árinov jaǵalaýdy nyǵaıtý jumystaryn jalǵastyrýdy jáne qorǵanys qurylystarynyń jaı-kúıine táýlik boıy monıtorıng júrgizýdi tapsyrdy.

Sondaı-aq, vedomstvo basshysy kólemdi bógetterdi tekserdi. Mahambet aýdanynyń Jalǵansaı eldi mekenine barǵan kezde mınıstr tasqyn sýdy sorý jumystarynyń barysymen tanysty.

Esterińizge sala keteıik, 22 mamyrda aýyl mańyndaǵy úıindi bóget shaıylyp, aýylǵa kireberis jol arqyly sý júrgen bolatyn. Sonaı-aq ótken táýlikte arnaıy tehnıkamen 450 myńnan astam tekshe metr sý soryldy.

Sáýir aıynan bastap óńirde qutqarýshylar toby kúsheıtildi. Qosymsha Qyzylorda, Túrkistan, Almaty, Aqtóbe, Mańǵystaý oblystarynan, Shymkent qalasynan TJM qyzmetkerleri jáne QR TJM 52 859 áskerı bóliminiń áskerı qyzmetshileri tartyldy.

Qajet bolǵan jaǵdaıda TJM qutqarýshylary sý basý oryndarynda adamdardy ótimdiligi joǵary tehnıkamen, onyń ishinde jyljymaly quraldarmen tasymaldaý boıynsha jumysty júzege asyratyn bolady.