Mahambet pen Inderdiń arasyn jalǵaıtyn jol ýaqytsha jabyldy
ATYRAÝ. KAZINFORM – Atyraý — Oral respýblıkalyq mańyzy bar tas jolynyń 71-shaqyrymynda jol ústimen ór sýyn ótkizý áli de jalǵasyp otyr.
«Bul sheshim ór sýynyń kóp kelýine ári sý qarqynynyń joǵarylyǵyna baılanysty, Mahambet aýdanyna qarasty Jaıyq boıynda ornalasqan eldimekenderdi tasqyn qaýipinen saqtaý maqsatynda qabyldanyp otyr», — dep habarlady Atyraý oblysynyń TJ jónindegi jedel shtaby.
Mahambet jáne Sarytoǵaı aýyly tusyna jınalǵan jaıylymdaǵy ór sýy joldyń ekinshi beti, ıaǵnı batys jaq betine jiberildi. Jaıyq ózeni jaǵalaýynan Atyraý-Oral tas jolynyń ara qashyqtyǵy shamamen 6-7 shaqyrymdy quraıdy.
«Jaǵdaı turaqty, aýyldyq eldi-mekenderge qaýip joq. Oral, Inder, Mahambetten Atyraý baǵytynda avtokólik júrgizýshileri Inder — Atyraý trassasy arqyly qatynaı alady», — delingen habarlamada.
