Mahambet Dosmuhambetov «Teńizshevroıldyń» jańa dırektoryn qabyldady

ATYRAÝ. QazAqparat - Atyraý oblysynyń ákimi Mahambet Dosmuhambetov «Teńizshevroıl» JShS-niń jańa basshysy Kevın Laıondy qabyldady, dep habarlaıdy Atyraý oblystyq kommýnıkatsııalar qyzmeti.

Aımaq basshysy kásiporynnyń jańa bas dırektory Kevın Laıondy qabyldap, aldaǵy jumysyna sáttilik tiledi.

«Munaı-gaz óndirisi salasynda mol tájirıbeńiz bar ekenin bilemiz. Ózindik tarıhy bar elimizdegi mańyzdy kásiporynnyń odan ary damýyna úlesińizdi qosatynyńyzǵa senemin, - dedi oblys ákimi.

«Teńizshevroıl» kompanııasymen birlese atqarylǵan jobalarǵa toqtalǵan Mahambet Dosmuhambetov «Bolashaq keńeıý jobasynyń» pandemııaǵa qaramastan ýaqytynda aıaqtalady degen senimin bildirdi.

Budan bólek, aımaq basshysy Mahambet Dosmuhambetov «Teńizshevroıl» JShS-niń burynǵy bas dırektory Imer Bonnerge birlesken jemisti jumysy pen tyǵyz áriptestik úshin alǵysyn bildirip, jańa qyzmetine sáttilik tiledi.

Óz kezeginde «TShO»-nyń eks-dırektory Imer Bonner oblys basshylyǵyna alǵysyn bildire otyryp, kásiporyn men oblys basshylyǵy yntymaqtastyǵynyń ary qaraı da jalǵasyn tabatynyna senim bildirdi.

«Osy ýaqytqa deıin oblys ákimdigimen birlesip kóptegen ıgilikti is jasadyq. Ásirese, pandemııa kezinde biz bir ujym emes, bir Atyraý bolyp birligimizdi kórsettik. Azamattarymyzdyń amandyǵy úshin ózińiz bas bolyp óndiristi te turalatapaı, adamdardy da aýyrtyp almaýǵa qatysty talqylaýlarymyz túnge deıin ulasyp, tań atpaı jalǵastyrǵan kúnderimiz boldy. Óte qıyn shaqtar bolǵanmen este qalatyn sátterge aınaldy. Qonaqjaı qazaq halqyna, óńir jurtyna alǵysymdy bildiremin»,- dedi ol.