Mahambet Dosmuhambetov: Sybaılas jemqorlyqtyń tamyr jaıýyna jol bermeý kerek

Oblys ákimi tótenshe jaǵdaıǵa baılanysty kúsheıtilgen karantın engizilgenmen, sybaılas jemqorlyqpen kúres máselesi kún tártibinen túspeıtinin atap ótti.
«Óıtkeni, Memleket basshysy ulttyq qaýipsizdik pen eldiń bolashaǵyna nuqsan keltiretin sybaılas jemqorlyqpen kúreske bir adamdaı jumylýǵa shaqyrdy. Sondyqtan, otandyq ekonomıka úshin, qoǵamnyń ár salasy úshin eń qaýipti kesel – sybaılas jemqorlyqtyń tamyr jaıýyna jol bermeýimiz kerek», - dedi oblys ákimi Mahambet Dosmuhambetov.
QR Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń mindetin atqarýshy Qanat Qojahmetov Antikor.Live. jobasy aıasynda sybaılas jemqorlyqqa qarsy kontentti onlaın formatta taratyp jatqanyna toqtaldy.
«Bıylǵy jyl basynan beri oblysta para alýǵa, bıýdjet qarajatyn jymqyrýǵa, sondaı-aq, ókilettigin teris paıdalanýǵa baılanysty 40-tan astam sybaılas jemqorlyq qylmysy anyqtaldy. Laýazymdy qyzmet atqaratyn 15 tulǵa qylmystyq jaýapkershilikke tartyldy. Sybaılas jemqorlyqtyń joǵary deńgeıi densaýlyq saqtaý jáne memlekettik satyp alý salalarynda baıqalady», - dedi Qanat Qojahmetov.
Onyń aıtýynsha, byltyrǵy qarashada sybaılas jemqorlyqqa qarsy zańnamaǵa túzetýler engizildi. Sonyń biri – baǵynyshty qyzmetkerleri arasynda sybaılas jemqorlyq faktisi anyqtalsa, basshylyq laýazymdaǵy memlekettik qyzmetshilerdiń tártiptik jaýapkershiligi men saıası qyzmetshilerdiń qyzmetinen ketý tetigi.
«Sybaılas jemqorlyqtyń aldyn alý, taralý joldaryn kesý, onyń órshýine jol bermeý baǵytyndaǵy kúresti kúsheıtýimiz kerek», - dedi selektorlyq keńesti qorytyndylaǵan oblys ákimi Mahambet Dosmuhambetov.