Mahambet Dosmuhambetov: Praımerızdiń negizgi maqsaty –el aldyna shyǵar kóshbasshyny tańdaý
Atyraý oblystyq kommýnıkatsııalar qyzmetiniń habarlaýynsha, óńir basshysy Mahambet Dosmuhambetov ótken praımerızdiń negizgi maqsattary men mindetterine toqtalyp, oblys atynan qatysqan barlyq úmitkerlerge óz alǵysyn bildirdi.
«Praımerızdiń negizgi maqsaty – partııaishilik saılaýda óndirip is jasaıtyn, el aldyna shyǵar kóshbasshyny tańdaý. Praımerızdiń mindeti – «Myqty lıderler - Myqty partııa» qaǵıdaty boıynsha shynaıy jáne myqty kóshbasshylardy partııa qataryna tartý, belsendi jáne bastamashyl azamattar úshin «áleýmettik lıft» qurý. Bastapqyda týyndaǵan keıbir kúdik pen kúmánge qaramastan, praımerız óte qarqyndy da tartysty ótti. Ásirese, dodaǵa qatysqandar arasynda jastar men áıelder qatary mol. Osynaý aıtýly sharaǵa qatysqan barsha úmitkerdi shyn júrekten quttyqtaımyn», - dedi oblys ákimi.
Sondaı-aq, shara barysynda aımaq basshysy Mahambet Dosmuhambetov respýblıkalyq «Biz Birgemiz» aktsııasyna qatysyp, COVID-19 indetine qarsy kúreste zor úles qosqan kásipkerlerge «Halyq alǵysy» medalin tabys etti. Óz kezeginde, partııaishilik irikteýge qatysýshylar alǵash ret qolǵa alynǵan saıası básekeden úlken tájirıbe jınaǵandaryn jetkizdi.
«Osyndaı úlken dodada baq synap, óz qabiletimizdi shyńdaǵanymyzǵa qýanyshtymyz. Praımerız jastarǵa, ásirese, kópbalaly analarǵa úlken múmkindik berdi. Óz basym úlken tájirbıe jınadym dep aıta alamyn. Sebebi, osy doda barysynda kóptegen máseleler qozǵap, halyqtan qoldaý taptyq», - deıdi praımerızge qatysýshy kásipker Malıka Jumaǵalıeva.
Aıta keteıik, oblysta praımerızdiń birinshi kezeńi boıynsha saılaýshylardyń daýysyn esepteý jumysy tolyqtaı aıaqtaldy. Tórt kún boıy «Praımerız» aqparattyq júıesinde tirkelgen músheleriniń 22 549-y nemese 94,4 paıyzy daýys berýge qatysqan. Onyń ishinde 22 322 partııalyq onlaın-formatta daýys berse, 227 nurotandyq dástúrli túrde qaǵaz bıýlletenmen tańdaýyn jasady.
Bul rette aımaq basshysy onlaın túrde daýys berýde el boıynsha joǵary belsendilik tanytqany úshin partııa múshelerine arnaıy alǵysyn bildirdi. Sonymen qatar, praımerız boıynsha baq synaǵandardyń 35,4 paıyzy áıelder bolsa, 37,6 paıyzy 35 jasqa deıingi jastar bolǵanyn, al qatysýshylardyń ortasha jasy — 38 ekenin aıryqsha atap ótti.
