Mahambet Dosmuhambetov: Qurylys nysandarynyń sapasyna kóńil bólý kerek
ATYRAÝ. QazAqparat –Atyraý oblysynyń ákimi Mahambet Dosmuhambetov selektorlyq keńes ótkizip, qurylys nysandarynyń sapasyna kóńil bólý qajettigin eske saldy, dep habarlaıdy QazAqparat.
Ákimniń pikirinshe, salynyp jatqan qurylys nysandardyń sapasy men qaýipsizdigine, jobalaý-smetalyq qujattama daıyndaý kezindegi buzýshylyqtarǵa nazar aýdarý kerek. Sebebi, atalǵan jaıttar qurylys protsesin sozyp, bastapqy josparlardy ózgertýge sebep bolady.
Oblystyq qurylys basqarmasynyń basshysy Málik Amanovtyń aıtýynsha, qazir óńirde 62 nysannyń qurylysy júrip jatyr. Al, 44 nysannyń jobalaý-smetalyq qujattamasy jasalǵan. Bıylǵy jyldyń birinshi toqsanynda mádenıet úıi, balabaqsha, oqýshylar men jastar saraıy, jataqhana sekildi 9 nysan paıdalanýǵa berilgen. Endi ekinshi toqsanda 8 nysannyń qurylysyn aıaqtaý josparlanǵan. Turǵyn úı qurylysy men ınjenerlik-kommýnıkatsııalyq ınfraqurylym jumystarynyń qarqyny báseńdemeıdi.
«Nysandar ýaqytyly tapsyrylýy tıis, ári sapasyna kóńil bólinýi kerek. Eshqandaı syn kótermeıtinderi bar. Bári emes árıne, biraq mundaı derekterdiń bary ras. Atyraý qalasy men aýdandardyń ákimderine áleýmettik nysandardyń qurylysyn baqylaýdy tapsyramyn»,- dedi oblys ákimi Mahambet Dosmuhambetov.
