Mahambet Dosmuhambetov koronavırýsqa qarsy óńirlik shtab komıssııasynyń otyrysyn ótkizdi
ATYRAÝ. QazAqparat –Atyraý oblysynyń ákimi Mahambet Dosmuhambetov koronavırýs ınfektsııasy boıynsha sanıtarlyq-epıdemııaǵa qarsy is-sharalardy uıymdastyrý jónindegi óńirlik shtab komıssııasynyń otyrysyn ótkizdi, dep habarlaıdy QazAqparat.
Oblys kóleminde atqarylyp jatqan qaýipsizdik sharalary, buǵan deıin berilgen tıisti tapsyrmalardyń oryndalý barysy týraly oblystyq densaýlyq saqtaý basqarmasynyń basshysy Baıtolla Ǵazızov baıandady.
«Dúnıejúzilik densaýlyq saqtaý uıymy koronavırýsty resmı túrde (indet) pandemııa dep jarııalady. Osyǵan baılanysty QR Premer-Mınıstriniń orynbasary Eraly Toǵjanov birqatar naqty tapsyrma bergen edi. Sondyqtan, oblysymyzda da saqtyq sharalaryn arttyrý úshin biraz is-sharaǵa tyıym salamyn. Buǵan barshańyz túsinistikpen qaraıdy dep senemin», - dedi oblys ákimi Mahambet Dosmuhambetov.
Ákim tyıym salynǵan birneshe sharany aıtty.
«Birinshiden, 13 naýryzdan bastap barlyq kópshilik is-sharalar, sonyń ishinde merekelik, mádenı-kópshilik, sporttyq sharalar, kınoteatrlarda kórsetilim, konferentsııalar, semınarlar men kórmeler ótkizý toqtatylsyn.
Ekinshiden, barlyq qoǵamdyq oryndar, densaýlyq saqtaý, bilim berý, halyqqa qyzmet kórsetý ortalyqtary, halyq kóp jınalatyn oryndar, qoǵamdyq tamaqtaný oryndary, bazarlar, saýda úıleri, vokzal, áýejaılar, qonaqúıler kúsheıtilgen sanıtarlyq - dezınfektsııalyq rejimge kóshirilsin.
Úshinshiden, kanıkýl kezinde oqýshylardyń óńirden tys jerlerge ekskýrsııa jasaýyna tyıym salynsyn.
Tórtinshiden, qoǵamdyq kólikter tazalanyp, dezınfektsııalaýdan ótkizilsin.
Besinshiden, orta bilim berý uıymdarynyń kanıkýlǵa 2020 jyldyń 16 naýryzynan 5 sáýir aralyǵynda shyǵýy qamtamasyz etilsin. 16 naýryzdan bastap kolledj jáne joǵary oqý oryndary qashyqtyqtan oqytýǵa, sonyń ishinde bilimdi baǵalaýdyń barlyq túrlerin qashyqtyqtan júrgizýge aýystyrylsyn.
Altynshydan, 1a, 1b, 2-3 sanattaǵy elderde ótetin halyqaralyq sporttyq, mádenı jáne týrısttik is-sharalarǵa barýǵa tyıym salynsyn», -dep atap ótti óńir basshysy.
