Mahambet Dosmuhambetov koronavırýs juqtyrǵandardyń jaǵdaıyn bildi
ATYRAÝ. QazAqparat –Atyraý oblysynyń ákimi Mahambet Dosmuhambetov №2 oblystyq ınfektsııalyq aýrýhanaǵa baryp, naýqastardy emdeý barysymen tanysty, dep habarlaıdy QazAqparat óńir basshysynyń baspasóz qyzmetine silteme jasap.
Mahambet Dosmuhambetov arnaıy medıtsınalyq qorǵanys kıimin kıip, palatalardy aralaǵan. Infektsııalyq statsıonarda em qabyldap jatqan naýqastardyń jaǵdaıymen tanysqan.
«Aýrýhananyń bas dárigeri Maǵjan Seıitjanovtyń aıtýynsha, 180 oryndyq ınfektsııalyq statsıonarda jansaqtaý bólimindegilerdi qosa alǵanda 192 naýqas jatyr. Olardyń barlyǵy –koronavırýs ınfektsııasyn juqtyrǵandar.
Kún saıyn jazylyp shyqqan patsıentter úıine jiberiledi. Nemese ambýlatorlyq emdeýge aýystyrylady. Patsıentter shyqqan soń palatalarǵa dezınfektsııalyq jumystar júrgizilip, kelesi kúni ózge naýqastar jatqyzylady.
Palatalardy aralap shyqqan oblys ákimi Mahambet Dosmuhambetov em alyp jatqandardyń jaǵdaıyn surap, tez jazylýyn tiledi.
Eske sala ketelik, buǵan deıin Atyraýda koronavırýsqa shaldyqqandar sany 6 myńnan asqan bolatyn.
