Mahambet Dosmuhambetov: Bizge tártip pen tózim kerek
ATYRAÝ. QazAqparat –Eń basty maqsatymyz – adamdardyń densaýlyǵy men qaýipsizdigin saqtaý. Bizge tártip pen tózim kerek. Sonda ǵana qaýipti ınfektsııany der kezinde aýyzdyqtaımyz. Oblys ákimi Mahambet Dosmuhambetov Atyraý qalasyndaǵy karantın talabynyń saqtalýyn tekserý kezinde osylaı málim etti, dep habarlaıdy QazAqparat.
«Oblystyq bas memlekettik sanıtarlyq dárigerdiń qaýlysymen Atyraý qalasynda karantınniń mezgili 1 mamyrǵa deıin uzartylyp, jeke avtokólikpen júrýge tyıym salyndy. Qazir qala aýmaǵynda polıtsııanyń jeke quramy jumys istep jatyr. Atyraý oblysy polıtsııa departamentiniń jergilikti polıtsııa qyzmeti basqarmasynyń basshysy Álibek Qaıyrovtyń aıtýynsha, ruqsatsyz júretin kóliktirdiń sany azaıǵan. Keshe 12 quqyqbuzýshylyq tirkelgen. Al, búgin kúsheıtilgen shekteýlerdi buzǵandarǵa 10 ákimshilik hattama toltyrylǵan. Qazir tek arnaıy ruqsat berilgen kólikter ǵana júrip jatyr» -dep habarlady oblys ákiminiń baspasóz qyzmeti.
Atyraý qalasynyń ákimi Qaırat Orazbaevtyń málimetine súıensek, qarttar men múgedekterge, jalǵyzbasty azamattarǵa tamaq, dári-dármek jetkizip berý men qosymsha qyzmet kórsetilýde. Qalada karantın bastalǵannan beri demeýshilermen birlesip, «BizBirgemiz» aktsııasy aıasynda 179 jalǵyzbasty zeınetker men múgedekke ystyq tamaq jetkizilgen. Sondaı-aq, I-II-shi toptaǵy múgedektigi bar balalar, jetim balalar, jalǵyz turatyn zeınetkerler jáne 109 senim telefonyna habarlasqan azamattar azyq-túlikpen jáne gıgıenalyq ónimdermen qamtamasyz etilgen.
«Oblys turǵyndarynyń jartysynan astamy Atyraý qalasynda turady. Koronavırýs ınfektsııasyn juqtyrǵandardyń basym bóligi osynda tirkeldi. Sondyqtan, qalada karantın talaby qatań saqtalýy kerek. Karantın merzimin uzartý biz úshin de ońaı bolmady. Eń basty maqsatymyz – adamdardyń densaýlyǵy men qaýipsizdigin saqtaý. Biz osyny eskerip, osyndaı sheshim qabyldadyq. Bizge tártip pen tózim kerek. Sonda ǵana qaýipti ınfektsııany der kezinde aýyzdyqtaımyz» -dedi Atyraý oblysynyń ákimi Mahambet Dosmuhambetov.
