Mahambet Dosmuhambetov: Atyraýda 2 aı ishinde ınfektsııalyq aýrýhana salynady
NUR-SULTAN. QazAqparat - Atyraý oblysynda osy jyldyń tamyz aıynyń sońyna deıin ınfektsııalyq aýrýhana salynyp, paıdalanýǵa berilýi múmkin. Bul týraly búgin Úkimet otyrysynda Atyraý oblysynyń ákimi Mahambet Dosmuhambetov aıtty, dep habarlaıdy QazAqparat tilshisi.
«Óńirde 595 oryndyq ınfektsııalyq statsıonar, onyń ishinde Atyraý qalasynda №2 oblystyq aýrýhanada - 180 oryn, Teńiz kenishinde - 315 jáne Mahambet aýdanyndaǵy dıspanserde 100 oryn uıymdastyryldy. Oblystaǵy 280 oryndyq ınfektsııalyq statsıonarda 198 naýqas em alyp, kórsetkish 70,7 paıyzdy qurap otyr. Al Teńizde uıymdastyrylǵan 315 oryndyq statsıonarda búgingi kúni 164 naýqas em qabyldaýda. Búgin oblys boıynsha aýrý belgilerimen tirkelgen 17 jaǵdaıdyń 15-i jáne aýrý belgileri joq 82 jaǵdaıdyń 63-i qala men aýdandarǵa tıesili. Óńirimizde kóptegen kásiporyn bar ekendigin bilesizder. 35 myń adam vahtalyq aýysymmen jumys isteıdi. Atalǵan máselelerdi eskere otyryp, oblys aýmaǵynda kópbeıindi ınfektsııalyq aýrýhananyń qajettiligi týyndap otyr», - dedi oblys ákimi.
Onyń atap ótýinshe, buǵan deıin Energetıka mınıstrligimen birge Soltústik Kaspıı jobasynyń merdiger kompanııalarymen atalǵan aýrýhana qurylysyna baılanysty kelissózder júrgizilgen.
«Tolyqqanda nátıjege jetken jaǵdaıda aýrýhana qurylysyn tamyz aıynyń sońynda aıaqtaý múmkindigin kórip otyrmyz», - dedi Mahambet Dosmuhambetov.
Atyraý oblysy ákiminiń dereginshe, óńirde aýrý belgileri joq naýqastardyń kóbeıýi saldarynan úıdegi ambýlatorııalyq baqylaýǵa alynǵan adamdar sany 624-ke jetti. Úı jaǵdaıynda ózin-ózi oqshaýlaýǵa múmkindigi joq naýqastardyń karantındik statsıonarlardaǵy sany sońǵy eki apta ishinde 31-den 200-ge deıin kóbeıdi. Oblystyq aýrýhanada ókpeni jasandy jeldetý apparatyna qosylǵan jaǵdaıy aýyr 6 naýqas em alýda.
«Oblysymyzda qonaqúıler men jataqhanalarda karantındik statsıonarlar uıymdastyryldy. Sondaı-aq 150-den astam medıtsına qyzmetkerlerine jumys aýysymynan tys ýaqytta demalýǵa arnaıy qonaqúıler bólindi», - dedi ol.
