Mahambet Dosmuhambetov: Atyraý óńirinde jyl saıyn 100 myń tal egemiz
NUR-SULTAN. QazAqparat - 2021 jyldan bastap Atyraý óńirin kógaldandyrý jumystaryna iri munaı-gaz kompanııalary jumyldyrylady.
Bul týraly búgin Atyraý oblysynyń ákimi Mahambet Dosmuhambetov aıtty, dep habarlaıdy QazAqparat tilshisi.
«2021 jyldan bastap orman qory men eldi mekenderdiń jerin qosa alǵanda 6 myń gektardy kógaldandyrý jáne kóshet otyrǵyzý jumystaryn júrgizý úshin iri munaı-gaz kompanııalaryn tartý josparlanyp otyr. Kógaldandyrý jumystary 3 jyldan 10 jylǵa deıingi kezeńge josparlanǵan. Ol barlyq aýdandarda júrgiziledi. Bul jyl saıyn 100 myńǵa deıin kóshet otyrǵyzýǵa múmkindik beredi. Buǵan qosa, biz Ekologııa, geologııa jáne tabıǵı resýrstar mınıstrligimen birlesip, óńirdiń ekologııalyq ózekti problemalaryn sheshý jónindegi jol kartasyn ázirledik», - dedi óńir basshysy Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, jol kartasy qorshaǵan orta sapasyn jaqsartý boıynsha barlyq salany qamtıtyn 40 tarmaqtan turady.
«Jaıyq ózenin saqtaý jáne tıimdi paıdalaný máselesi ótkir tur. Onyń aǵynyń shamamen 80 paıyzy kórshiles Reseıde qalyptasady. Sondyqtan ózeniń tómengi saǵasynda ornalasqan óńir joǵary jaqtaǵy iri sý qoımalary men gıdrotehnıkalyq qurylǵylarǵa táýeldi bolyp otyr. Sońǵy 2 jylda aǵyn kólemi 3 esege jýyq qysqaryp ketti. Sondyqtan Jaıyq pen Qıǵash ózenderiniń 200 shaqyrymynda birneshe jyl boıy ózen tabanyn tereńdetý jumystary júrgizilýde», - dedi ol.
