Mahambet Dosmuhambetov Atyraý oblysynda qansha adam vaktsına alǵanyn aıtty
NUR-SULTAN. QazAqparat – Atyraý oblysynda 385 sýbekt «Ashyq» qosymshasymen jumys istep jatyr. Bul týraly Ortalyq kommýnıkatsııalar qyzmetindegi brıfıng barysynda Atyraý oblysynyń ákimi Mahambet Dosmuhambetov aıtty, dep habarlaıdy QazAqparat tilshisi.
«Tutastaı alǵanda jaǵdaı turaqty. 26 mamyrdan bastap oblysymyz «sary» aımaqta. Infektsııalyq tósekterdiń júktemesi 16 paıyzdy quraıdy. Em alyp jatqan naýqastardyń sany – 337. Oblys boıynsha 12 statsıonarda 2 098 naýqasqa ınfektsııalyq tósek-oryn jasaqtalǵan. Onyń 81-i reanımatsııalyq oryn. Qosymsha 750 rezervtik tósek daıyndaldy», - dedi oblys ákimi.
Onyń dereginshe, aqpannan beri óńirge 111 200 doza vaktsına jetkizildi. Oblys boıynsha barlyq talaptarǵa saı keletin vaktsınatsııa salatyn 41 ekpe pýnkti ashyldy.
«Búginde 69 304 adam vaktsınanyń I komponentin, 27 569 adam II komponentin aldy. Óńirimizde qazirgi kezde 385 sýbekt «Ashyq» qosymshasyn engizip, QR-kodpen jumys isteýde», - dedi Mahambet Dosmuhambetov.
