Mahambet aýdanyndaǵy Taldykól aýylynyń 140 turǵyny Atyraýǵa kóshirildi

ATYRAÝ. KAZINFORM – Mahambet aýdanyndaǵy Taldykól aýylynyń 140 turǵyny Atyraý qalasyna kóshirildi.

Mahambet aýdandyq jedel shtabtyń málimetinshe, Taldykól aýylyndaǵy turǵyndar erikti túrde kóshirilip jatyr. Turǵyndardy evakýatsııalaýǵa 25 oryndyq 4 avtobýs, 12 orny bar 2 GAZel avtokóligi men 30 qyzmetker tartylǵan.

«Beıbarys aýyldyq okrýgindegi Taldykól aýylynda 221 úı, 1215 turǵyn bar. Keshke deıin aýyldyń 140 turǵyny Atyraý qalasyna jetkizilip, APEC joǵary kolledjindegi evakýatsııa pýnktine ornalastyryldy. Onyń ishinde 29 er, 50 áıel, 3 múmkindigi shekteýli jan, 2 júkti ana, 16 jasqa deıingi 52 jasóspirim men 1 jasqa tolmaǵan 4 sábı bar», - dep habarlady aýdandyq jedel shtabtan.

Al, jigitter aýyldy tasqyn sýdan qorǵaý úshin qalǵan. Qazir bul aýylda tasqyn sýǵa qarsy jumysqa tótenshe jaǵdaılar salasynyń 107 qyzmetkeri, 28 áskerı qyzmetshi jumyldyrylǵan. Arnaıy 9 tehnıka bar.

Eske sala ketelik, budan buryn Atyraý oblysyndaǵy Taldykól aýylynyń turǵyndaryn evakýatsııalaý bastalǵanyn habarlaǵan edik.