Mahachkalanyń áýe keńistigi jabylǵan boıda AZAL ushaǵy keri oraldy

ASTANA.KAZINFORM — Bul týraly AZAL ishki jáne syrtqy kommýnıkatsııalar bóliminiń basshysy Farıd Gýseınov málimdedi. 

— Baký — Mıneralnye vody baǵyty boıynsha J2-8717 reısin oryndaıtyn Azerbaijan Airlines (AZAL) áýe kemesiniń kapıtany, ushqannan keıin Baký áýe keńistiginen shyqpaı jatyp, Mahachkala áýe keńistigin jabý týraly NOTAM (ushý týraly habarlama) alǵannan keıin birden oralýǵa sheshim qabyldady. Ushaq Geıdar Álıev halyqaralyq áýejaıyna jergilikti ýaqyt boıynsha 10:13–te aman-esen qondy, dep habarlady kompanııa ókili.

Aıta keteıik, 25 jeltoqsanda Bakýden Groznyıǵa bet alǵan Ázerbaıjan Arilines kompanııasynyń Embraer ushaǵy Qazaqstannyń Aqtaý qalasyna jaqyn jerde apatqa ushyraǵan bolatyn. Ushaq bortynda 62 jolaýshy, onyń ishinde Ázerbaıjannyń 37, Reseıdiń 16, Qazaqstannyń 6 jáne Qyrǵyzstannyń 3 azamaty, sondaı-aq bes ekıpaj múshesi bolǵan. Oqıǵa saldarynan 38 jolaýshy qaza taýyp, 29 adam, onyń ishinde úsh bala aman qaldy.

Biz buǵan deıin Aqtaý mańynda ushaq apaty bolǵanyn jazǵan bolatynbyz.

Sondaı-aq Azerbaijan Airlines ushaq apatynan zardap shekkenderge 20 myń manat (5 mıllıon teńgeden astam) tóleıtini, al qaza bolǵandardyń árqaısysynyń otbasyna 40 myń manat (11 mıllıon teńgeden astam) kóleminde ótemaqy beriletini habarlandy.

Ázerbaıjan prezıdenti Ilham Álıevtiń jarlyǵymen 2024 jyldyń 26 ​​jeltoqsany Ázerbaıjanda ushaq apatynda qaza tapqandardy eske alý úshin aza tutý kúni bolyp jarııalandy.

Aqtaý, Quryq jáne Baýtıno porttarynda 2024 jylǵy 25 jeltoqsanda bolǵan áýe apatynda qaza tapqandardy eske alý jáne qaıǵyrý belgisi retinde Kaspıı teńiziniń sýyna aza tutý gúl shoqtary qoıyldy.