Mahachkalada júzdegen adam áýejaı mańyna kelip, narazylyq aktsııasyn uıymdastyrdy
Jeksenbi kúni Tel-Avıvten Mahachkala áýejaıyna turaqty reıs kelip toqtaǵan áýejaı ornalasqan aýmaqqa júzdegen adam kelip, narazylyq aktsııasyn uıymdastyryp jatyr.
Jınalǵandar Palestına-Izraıl qaqtyǵysyna narazy, dep habarlaıdy Kazinform reseılik TASS agenttigine silteme jasap.
Áýejaıdaǵy tabloǵa qaraǵanda, ushaq Tel-Avıvten Mahachkalaǵa jergilikti ýaqyt boıynsha saǵat 19:17-de kelgen. Narazylyq bildirýshilerdiń bir bóligi ushyp kelgen reıstiń jolaýshylaryn izdep, halyqaralyq termınalǵa kirip ketken.
Oqıǵa ornynda birneshe polıtsııa qyzmetkeri júr, olar narazylyq bildirýshilerge túsindirý jumystaryn júrgizip jatyr.
Sondaı-aq TASS agenttigi Mahachkala áýejaıynyń jabylǵanyn habarlady. Oǵan bógde adamdardyń ushý alańyna ótip ketýi sebep bolǵan.
Rosavıatsııanyń habarlaýynsha, ushaqtar qazir ózge áýejaılarǵa jiberilip jatyr.
