Mahabbatynyń jaýapsyz qalǵanyna kúızelgen semeılik saýda úıine «bomba» qoıǵan
SEMEI. QazAqparat – Semeı qalasynyń turǵyny jaýapsyz mahabbat úshin qylmysqa barǵan, dep habarlaıdy QazAqparat tilshisi.
ShQO boıynsha QAJ departamenti baspasóz qyzmetiniń málimetine súıensek, boıjetkenge kózi túsken jigit onymen jaqynyraq sóıleskisi kelgen. Alaıda qyzdyń oǵan kóńili aýmady. Soǵan qaramastan er adam ǵashyǵynyń áleýmettik jelidegi paraqshasyna kún saıyn kirip júrdi. Birde ol boıjetkenniń bógde bireýmen shetelde demalyp kelgenin kórgen.
Keýdesin qyzǵanysh kernegen semeılik álgi erkekke zalal keltirý úshin aldyn ala jospar qurady. Telefon satyp alyp sol azamattyń atyna tirkeıdi de jańa smartfonnan ýchaskelik ınspektorǵa saýda úıleriniń birine bomba qoıylǵandyǵy týraly habarlama jiberedi. Sodan keıin telefon men sım-kartany ózenge laqtyra salǵan. Osylaısha, ǵashyǵy kezdesip júrgen jigittiń bedeline nuqsan keltirýdi kózdedi.
«Sot otyrysynda aıyptalýshy óz kinásin tolyqtaı moıyndap, istegen isine qatty ókinetindigin jetkizdi. Qylmys jasaǵany úshin oǵan 6 aı bas bostandyǵynan shekteý jazasy taǵaıyndaldy. Er adam probatsııa qyzmetinde tirkeýge alyndy», - dedi probatsııa qyzmetiniń ınspektory Gúljan Baıdaqpaeva.
