«Mahabbat» kompozıtsııasy jyl áni dep tanyldy - «Astana Juldyzy»
ASTANA. QazAqparat - Elordadaǵy Beıbitshilik jáne kelisim saraıynda kásibı «Astana Juldyzy. Ulttyq mýzyka báıgesi-2014» mýzykalyq syılyǵyn tabystaý saltanatty sharasy ótti.
Osymen ekinshi ret ótkizilip otyrǵan shara, uıymdastyrýshylardyń ýádesi boıynsha, bıylǵy jyldaǵy qazaqstandyq shoý-bıznestiń eń kórnekti oqıǵasyna aınaldy. Qyzyl kilemniń ústimen eldiń barlyq shyǵarmashyl elıtasy júrip ótti. Qazaqstannyń mýzykalyq ındýstrııasynyń ókilderi elimizdiń júzden júırik, myńnan tulpar talanttardy anyqtaýǵa keldi.
«Jyl áni» atalymynda Qaırat Baekenov pen «Format» toby «Mahabbat» kompozıtsııasymen jeńimpaz atandy.
«Biz óte qýanyshtymyz. Bizge daýys bergenderge myń alǵys. Bas tusynda biz bul óleńdi ınternetke salǵanda, ol tyńdarmandarǵa onsha qatty unamap edi. Keıin, jarty jylda ol qatty tanymal bolyp ketti», - deıdi Q. Baekenov.
«Úzdik ánshi» nomınatsııasynda Medeý Arynbaev, «Úzdik oryndaýshy» - Janar Duǵalova jeńdi. Rin'Go toby «Eń úzdik erler toby» atalymynda birinshi oryn alsa, KeshYou «Eń úzdik áıelder toby» ataǵyna laıyq dep tanyldy. Renat Ǵaısın «Eń úzdik kompozıtor» atanyp, syılyqty Keńes Dúısekeevtiń qolynan aldy. Al Ǵalymjan Moldanazar - «Jyl jańalyǵy», Abdrahman Asylbek - «Úzdik aqyn» (Mátin avtory), Terra - «Eń úzdik bı toby», Zarathustra band - «Eń úzdik Live-band» dep tanyldy. «Úzdik klıpmeıker» atalymynda Asqar Uzabaev oq boıy ozyq boldy, degenmen ol óz syılyǵyn osy atalymda úmitker bolǵan Ernar Nurǵalıevke berip ketti.
«Mádenıettiń damýyna qosqan úlesi úshin» syılyǵyn «Dos-Muqasan» tobynyń múshesi Murat Qusaıynov aldy. Sondaı-aq otandyq mádenıettiń damýyna úlken eńbek sińirgen aqyndar Shómishbaı Sarıev pen Israıl Saparbaı, estrada juldyzdary Naǵıma Esqalıeva men Qaraqat Ábdildına qurmet gramotalaryna ıe boldy.
Baıqaýdyń júrgizýshileri Baıan Esentaeva, Dınara Sátjan, Aıgúl Imanbaeva men Nurdáýlet Shertim kórermenderge orasan zor qýanysh syılap, sharanyń kórkin qyzdyrdy.
Shara uıymdastyrýshylary baıqaý barysynda birneshe mınýt ýaqytty marqum Farıza Ońǵarsynovany eske alýǵa arnaıy bólip, aqynnyń rýhyna taǵzym etti. Aqynnyń qurmetine opera ánshisi Sara Naıman klassıkalyq ánderdiń birin oryndap berdi.
Eske salaıyq, atalmysh shara byltyr Astana ákimdiginiń uıymdastyrýymen bastaý alǵan bolatyn. «Astana Juldyzy. Ulttyq mýzyka báıgesi» baıqaýy barysynda álemdik deńgeıdegi mýzykalyq syılyqtardyń daýys berý, baǵalaý tehnologııalary qoldanylady jáne barlyq halyqaralyq standarttar boıynsha ótkiziledi.
