Mahabbat Esen: Teledıdardyń «aqyry» týraly áńgime sánnen qalǵan
NUR-SULTAN. QazAqparat - Buqaralyq aqparat quraldaryn qoldaý qorynyń jetekshisi, Astana Media Week medıa aptalyǵynyń uıymdastyrýshysy Mahabbat Esen teledıdardyń bolashaǵyna qatysty pikir bildirdi, dep habarlaıdy QazAqparat tilshisi.
Áýeli Mahabbat Esen osymen úshinshi jyl qatar ótip jatqan Astana Media Week medıa aptalyǵy bıyl nesimen erekshelengenin aıtty.
«Birinshi jyly barlyq arnalardy, medıatorlardy, óndirýshilerdi biriktiretin kommýnıkatıvtik alań qurý kózdegen edik. Árıne, alǵy shepte televızııa salasynyń ókilderi turdy. Solar úshin osyndaı pikir almasý alańyn qurǵymyz kelgen bolatyn. Alǵashynda osyndaı alań quryp, adamdardy aqparattandyrý, úıretý maqsat etilse, ótken jyly memleket qarajatyna jasalǵan barlyq kontent óńirlik arnalarǵa tegin berildi», - dedi Mahabbat Esen.
Onyń aıtýyna qaraǵanda, bul jolǵy sharada aqparatty sol kúıinde qabyldaıtyn «sezimtal toptarmen» jumys tásili negizgi taqyryp bolǵanyn aıtady.
«Bıylǵy aptalyqtyń mazmuny erekshe. Qatyp qalǵan eshteńe joq qoı. Búkil álem talqylap jatqan jańalyqtardan qur qalmaı, baǵyp otyratyn boldyq. Aqparat tutynýshylardyń talaby men talǵamy qandaı degen másele ózekti bolyp tur. Aqparat óte kóp jáne bul eldi sharshatady. Medıamádenıet, medıasaýattylyq degen dúnıeler bizdiń qoǵamda qatty damyp ketti dep aıtýǵa kelmeıdi», - degen ol dástúrli sanalatyn BAQ pen zamanaýı aqparat berý formatynyń arasyndaǵy báseke týraly pikir bildirdi.
«Bul aptalyqta árkimniń pikirin estý mańyzdy boldy. «Teledıdardy ınternet ysyryp tastaı ala ma?» degen suraq áli bar. Aptalyqqa qatysýshylar televızııa salasyna ázirge eshqandaı jamandyq tónip turǵan joq degen paıymǵa kelip jatyr. Sondyqtan, osy tóńirektegi daýdy doǵaratyn kez jetken sııaqty. Tipti bul taqyryp sánnen qalǵan. Múmkin teledıdar aqparat naryǵynda osydan 30-40 jyl burynǵydaı qojalyq ete almas, biraq ol búgin aqparatty tikeleı taratýdyń teńdessiz alańyna aınalyp otyr. Qazir BAQ tıimdiligi kontentpen ólshenedi. ıAǵnı kórsetilim alańynyń qurylymy mańyzdy emes. Teledıdar ma, YouTube kanaly ma, áleýmettik jeli me, ol mańyzdy emes. Eń mańyzdysy – mazmun. Sapaly jýrnalıstıka eshqashan ólmeıdi», - deıdi tanymal jýrnalıst.
