Maǵzum Myrzaǵalıev: Jyl saıyn bir zaýyt qana jóndeýden ótse, janarmaı tapshylyǵy bolmaıdy

NUR-SULTAN. QazAqparat –Kúzdegideı janarmaı tapshylyǵy bolmaý úshin munaı óńdeý zaýyttaryn jóndeý kestesi qatań saqtalýy kerek. Energetıka mınıstri Maǵzum Myrzaǵalıev Ortalyq kommýnıkatsııalar qyzmetinde ótken brıfıngide osyndaı pikir bildirdi, dep habarlaıdy QazAqparat tilshisi.

«Bizge byltyrǵy qyrkúıek-qazan aılaryndaǵydaı tapshylyq boldyrmaýǵa múmkindik beretin birneshe sharany usynyp otyr. Solaı bolaryna sengim keledi, Birinshisi – zaýyttardy jóndeý máselesin túbegeıli sheshetin norma. Biz munaı óńdeýshi zaýyttardy jóndeý boıynsha 5 jyldyq jospardyń kestesin ázirledik. ıAǵnı, jylyna bir zaýyt qana jóndeýden ótýi kerek. Tıisinshe, úsh zaýyt birinen keıin birin jóndelip otyrady», - dep túsindirdi vedomstvo basshysy.

Mınıstrdiń aıtýynsha, janarmaı tapshylyǵy sezile qalsa, naryqtyń suranysyna jaýap beretin jaǵdaıda qosymsha qor saqtap otyrý kerek.

«Qańtar aıynan bastap biz kestege qol qoıdyq.Osylaısha dıezldiń 200 myń tonnaǵa jýyq qoryn qalyptastyrýdy josparlap otyrmyz. Onyń 150 myń tonnasyn «QazMunaıGaz», 50 myń tonnany «QTJ» óz moınyna alady. Úshinshi mańyzdy norma – zańnamadaǵy novella. Ol munaı bazalaryn «datchıktermen» jabdyqtaýǵa baılanysty. Osy kúzde biz eldegi naqty kórinisti bilmegendikten qıyndyqqa tap boldyq. Qazir zańnamalyq novellalar ázirlenip jatyr. 2023 jyldyń shildesinen bastap iri munaı bazalaryn «datchıktermen» jabdyqtalady dep josparlap otyrmyz. 2024 jyldyń 1 shildesinen bastap usaq munaı bazalary da esepteý júıesimen jabdyqtalady», - dep túsindirdi Maǵzum Myrzaǵalıev.