Maǵzum Myrzaǵalıev jyl saıyn 1,5 mln tonnadan astam qaldyqty kádege jaratý jolyn atady

NUR-SULTAN. QazAqparat - Elimizde jasyl tarıfti engizý kezinde arqyly jyl saıyn 1,5 mln tonnadan astam qaldyqty kádege jaratýǵa bolady. Bul týraly búgin Úkimet otyrysynda QR Ekologııa, geologııa jáne tabıǵı resýrstar mınıstri Maǵzum Myrzaǵalıev aıtty, dep habarlaıdy QazAqparat tilshisi.

«Elimizde jańartylatyn energııa kózderin odan ári damytý úshin birinshiden, Energetıka mınıstrligi ázirlegen shaǵyn generatsııany ornalastyrý, atap aıtqanda, jańartylatyn energııa kózderin turmysta paıdalaný bóliginde zańnamaǵa tolyqtyrý engizýdi qoldaýy elimizdegi turǵyn úı-kommýnaldyq sharýashylyǵynyń energııa syıymdylyǵyn tómendetýge múmkindik beredi», - dedi mınıstr.

Ekinshiden, onyń aıtýynsha, mınıstrlik qoqystardy kádege jaratý arqyly elektr qýatyn óndirip shyǵarý úshin ınvestıtsııa tartý máselesin qarastyryp jatyr.

«Negizgi kedergi ınvestıtsııalyq tartymdylyqtyń tómendigi bolyp otyr. Osy máseleni sheshý úshin qoqys óńdeıtin zaýyttardan óndiriletin elektr energııasyna jańartylatyn energııa kózderiniń jasyl tarıfin qoldanýdy usynamyz. Bul shara polıgondarda qoqystardy kómý kólemin aıtarlyqtaı tómendetýge múmkindik beredi. Jasyl tarıfti engizý kezinde biz jyl saıyn 1,5 mln tonnadan astam qaldyqty kádege jarata alamyz. 1 mln tonna qaldyq syıatyn polıgon – bul 7,5 gektar jer, nemese 15 fýtbol alańy», - dedi M.Myrzaǵalıev.

Budan basqa, mınıstrdiń sózine qaraǵanda, búgingi tańda Energetıka mınıstrligi Dúnıejúzilik bankpen birlesip Qazaqstandaǵy geotermaldy kózderdiń áleýetin baǵalaý boıynsha jumys júrgizgen. Nátıjesinde geotermaldy kózderdiń negizinde jylý energetıkasyn Almaty jáne Túrkistan oblystarynda damytýǵa bolatyny anyqtalǵan.

«Bul rette, jalpy jel jáne kún energııasy jobalaryna áleýetti ınvestorlardy tartýǵa kómektesetin aldyn ala ınvestıtsııalyq zertteýler júrgizý qajet. Osy jumystar boıynsha Ekologııa, geologııa jáne tabıǵı resýrstar mınıstrligi qajetti qoldaý kórsetýge daıyn», - dedi ol.