Maǵzum Myrzaǵalıev jas sarapshylardy ekologııa máselesin sheshýde kúsh biriktirýge shaqyrdy
Búgin QR ekologııa, geologııa jáne tabıǵı resýrstar mınıstri Maǵzum Myrzaǵalıev QR Parlamenti Senaty janyndaǵy Jas sarapshylar klýbynyń tórtinshi otyrysyna qatysty.
Talqylaý taqyryby ekologııa, tabıǵı resýrstardy utymdy paıdalaný jáne turaqty damý máseleleri boldy.
Jas sarapshylar elimizdiń qalalaryndaǵy aýa sapasy, sý resýrstaryn basqarý, ósimdikter men janýarlardyń sırek kezdesetin jáne joıylyp ketý qaýpi bar túrlerin saqtaý sııaqty ekologııa jáne qorshaǵan ortany qorǵaý salasyndaǵy túrli máselelerdi kóterdi.
Mysaly, Ulttyq bıotehnologııa ortalyǵyndaǵy adam genetıkasy zerthanasynyń meńgerýshisi, professor Maqsat Jabaǵın bıoalýantúrliliktiń ulttyq bıobankin qurýdy usyndy.
«Qazaqstannyń florasy men faýnasynyń bıoalýantúrliligin saqtaý úshin erekshe qorǵalatyn tabıǵı aýmaqtarmen qatar ǵylymı maqsattar úshin bıologııalyq úlgilerdi jınaý, saqtaý, óńdeý jáne taratý jáne utymdy paıdalaný jónindegi biryńǵaı operator retinde bıologııalyq resýrstardyń ulttyq ortalyǵyn nemese Bıoalýantúrliliktiń Bıobankin qurý qajettiligi pisip-jetildi. Bul ǵylymı zertteý maqsatynda jınalǵan jáne saqtalǵan bıologııalyq úlgilerge basqa uıymdardyń ǵylymı toptaryna júginýge múmkindik beredi», - dedi ol.
Tómenkómirtekti damý jónindegi sarapshy, Dornier Consulting konsýltanty Gúljamal Isaeva saıası sheshimder qabyldaý jáne halyqty habardar etý úshin tsıfrlyq taldamalyq platformany ornatý arqyly monıtorıng stantsııalarynyń jelisin keńeıtý qajet dep sanaıdy.
Onyń pikirinshe, bul qala aýdandarynda atmosferanyń lastaný deńgeıin onlaın rejımde jáne grafıkalyq formatta baqylaýǵa múmkindik beredi.
Maǵzum Myrzaǵalıev otyrys barysynda aıtylǵan suraqtar men usynystarǵa jaýap bere otyryp, Jas sarapshylar klýbyn mınıstrliktiń júrgizip jatqan jumysy men bolashaqqa josparlary týraly habardar etti.
«Siz kótergen barlyq másele óte mańyzdy jáne ózekti. Barlyq osy baǵyttar boıynsha biz turaqty negizde monıtorıng, zertteý júrgizemiz jáne alynǵan derekter negizinde is-qımylymyzdy josparlaımyz. Árıne, ekologııa máselelerin birden sheshý múmkin emes. Biraq kezeń-kezeńimen biz tıimdi ózgeristerge qadam basyp kelemiz», - dep atap ótti mınıstr.
Vedomstvo basshysy jańa ekologııalyq kodekstiń qabyldanýyn, sondaı-aq árbir óńir boıynsha Jol kartasyn bekitýdi ekologııalyq saýaldardy sheshýdiń pármendi quraly dep atady.
Sonymen qatar, ázirlenip jatqan «2021-2025 jyldarǵa arnalǵan Jasyl Qazaqstan» ulttyq jobasy týraly da aıtyldy.
«Qazir biz Sý resýrstaryn basqarý boıynsha ulttyq jobany qurý boıynsha jumys istep jatyrmyz. Joba sý teńgerimin saqtaýǵa, jańa ırrıgatsııalyq júıelerdi salýǵa, sý sharýashylyǵy ınfraqurylymyn jańǵyrtýǵa múmkindik beredi jáne sý únemdeýge kómektesedi», - dep atap ótti vedomstvo basshysy.
Sonymen qatar, mınıstr eldi kógaldandyrý sharalary týraly da habarlady.
«Keshendi jospar bekitildi, óńirler boıynsha qoný kólemi anyqtaldy. 2 mlrd aǵash otyrǵyzýdy monıtorıngteý boıynsha ınteraktıvti karta jasalady. Naýryz meıramynda Memleket basshysynyń atalǵan bastamasyn iske asyrý bastaldy, «Taza tabıǵat» jobasy bastaý aldy. Sondaı-aq, aǵash kesý jaýapkershiligin qatańdatý boıynsha zańnamalyq sharalar bekitildi, «Janýarlarǵa jaýapkershilikpen qaraý týraly» zań jobasy Májiliste», - dedi ol.
Maǵzum Myrzaǵalıev sondaı-aq jas sarapshylardy tıimdi nátıjege qol jetkizý úshin ekologııa máselelerin sheshý salasyndaǵy birlesken jumysty kúsheıtýge shaqyrdy.
