Maǵzum Myrzaǵalıev jańa ekologııalyq kodeks týraly: Bul - reformatorlyq qujat

NUR-SULTAN. QazAqparat – Ekologııany jaqsartý úshin bizdiń ónerkásipte aıtarlyqtaı tehnıkalyq jáne tehnologııalyq júıeli ózgeristerdi iske asyrý qajet. Ekologııa, geologııa jáne tabıǵı resýrstar mınıstri Maǵzum Myrzaǵalıev jańa Ekologııalyq kodekske qatysty osyndaı pikir bildirdi, d ep habarlaıdy QazAqparat tilshisi.

Prezıdent Qasym-Jomart Toqaev jańa Ekologııalyq kodekske úsh kún buryn qol qoıǵan bolatyn.

«Búgingi kúni qoǵamdy ekologııa máseleleri, qorshaǵan ortanyń jaǵdaıy kóp tolǵandyryp keledi. Ekologııa, geologııa jáne tabıǵı resýrstar mınıstri retinde bul meni, árıne, qýantady. Azamattardyń belsendiligi men berik ustanymy bizdi tıimdi sharalar qabyldaýǵa yntalandyratyny sózsiz», - dedi Maǵzum Myrzaǵalıev búgin OKQ-da ótken baspasóz máslıhatynda.

Mınıstrdiń aıtýynsha, Prezıdent Joldaýynda qorshaǵan ortany qorǵaý men bıoalýantúrlilikti saqtaý máselelerine aıryqsha nazar aýdarylǵan.

«Birinshiden, jańa Ekologııalyq kodeksti qabyldaý týraly aıta keteıin. Bul - asa mańyzdy qujat. Ol jan-jaqty talqylandy. Jasyratyny joq, ekologııalyq jáne ekonomıkalyq múddeler arasyndaǵy tepe-teńdikti eskerý qajet bolǵandyqtan, qıyndyqtar kezdesti. Ekologııalyq ahýaldy barynsha tez jaqsartamyn degen azamattardyń yqylasyn túsinýge bolady. Alaıda bul ahýal bir degende emes, birneshe jyldyń ishinde ońalady. Sebebi ekologııany jaqsartý úshin bizdiń ónerkásipte aıtarlyqtaı tehnıkalyq jáne tehnologııalyq júıeli ózgeristerdi iske asyrý qajet», - dedi ol.

Maǵzum Myrzaǵalıev q abyldanǵan qujatty reformatorlyq dep atady.

«Jáne de ol Ekonomıkalyq yntymaqtastyq jáne damý uıymy (OESR) men Eýropa elderiniń ozyq tájirıbesin eskere otyryp, pysyqtaldy», - dedi mınıstr.