Maǵzum Myrzaǵalıev Túrkistan oblysyndaǵy gaz máselesin sheship berýge ýáde etti
QR Energetıka vıtse-mınıstri Maǵzum Myrzaǵalıevtiń aıtýynsha, Túrkistan oblysyna arnaıy komıssııa baryp keldi. Sonyń esebine sáıkes, 10 gaz taratý stansasy durys salynbaǵan.
«Endi, «QazTransGaz» ol úshin jaýapkershilikti óz moınyna alǵysy kelmeıdi. Biraq jaqynda Úkimet basshysynyń Túrkistan qalasyna jasaǵan sapary kezinde biz naqty bir kelisimge keldik. Arnaıy jumys toby qurylady. Qazirgi josparǵa sáıkes, aldymen ákimdik, ıa bolmasa, merdiger kompanııalardyń kúshimen qazirgi texnıkalyq olqylyqtardy túzetý kerek. Sosyn tarıf máselesi taǵy bar. Búginde tarıf birden bes jylǵa bekitiledi. «QazTransGaz» ókilderi aıtady, gaz júıelerin ákimdikten qabyldaıtyn bolsam, onyń bárin ustaý úshin shtatty ulǵaıtýǵa týra keledi. Jańa jumysshylarǵa jalaqy tóleý kerek. Al tarıfti ózgertýge bolmaıdy», - dedi M.Myrzaǵalıev QR Parlament Májilisinde ótken baspasóz máslıxatynda.
Onyń sózine qaraǵanda, atalǵan máseleni sheshýdiń eki joly bar. Tarıfti kóterý kerek. Sonda «QazTransGaz» qosymsha shyǵyndaryn óteı alady, ıa bolmasa, ákimdik ol aqshany jergilikti bıýdjetten tólep otyrýy tıis.
«Máselen, «QazTransGaz» ben ákimdik kelisimshartqa otyrady da, jergilikti bıýdjetten kompanııanyń servıstik qyzmeti tólenip turady. Taldyqorǵan qalasynda solaı isteıdi. Men bul máseleni óz moınyma alýǵa daıynmyn. Jyldyń sońyna deıin atalǵan máseleni sheshýge tyrysamyz», - dep atap kórsetti M.Myrzaǵalıev.
Aıta keteıik, búgingi jıynda QR Energetıka vıtse-mınıstri Maǵzum Myrzaǵalıev «Saryarqa» gaz qubyrynyń qurylysy týraly aıtyp berdi.
«Saryarqa» gaz qubyry aldymen Qyzylorda, Jezqazǵan, Qaraǵandy, Temirtaý men Nur-Sultan baǵytymen salynady. Bul - qurylystyń alǵashqy kezeńi. Osynyń arqasynda qubyrǵa jaqyn ornalasqan 740 myń adamdy tabıǵı gazben qamtasyz etýge múmkindik bar. Árıne, ınfraqurylymnyń salynýyna qaraı gaz tutynatyn adamdardyń sany artady. Ótken jyly tamyz aıynda Úkimet jobanyń syzba-nusqasy men qarjylandyrý sharttaryn maquldady. Jobanyń quny - 267,3 mlrd teńge. Qarasha aıynda «Astana gaz» AQ men merdiger kompanııa -«Qazqurylysqyzmet» AQ arasynda tıisti kelisimshartqa qol qoıyldy. Qazirgi kezde barlyq qajetti texnıka men mamandar tartyldy. Dánekerleý jumystary bastaldy. «Saryarqa» gaz qubyrynyń, shamamen, 1300 metri salyndy», - deıdi M.Myrzaǵalıev.
Al elordanyń otyn-energetıkalyq kesheni jáne kommýnaldyq sharýashylyq basqarmasynyń basshysy Erbol Tóleýov Kóktaldan keıin gazdyń qaı baǵytta tartylatynyn túsindirdi.
Qaraǵandy oblysy bolsa, múldem gazsyz qalýy ábden múmkin.
