Maǵzum Myrzaǵalıev TMD-nyń Memleketaralyq ekologııalyq keńesiniń tóraǵasy bolyp saılandy

NUR-SULTAN. QazAqparat - 2021 jylǵy 3 qyrkúıekte onlaın formatta TMD - ǵa qatysýshy memleketterdiń Memleketaralyq ekologııalyq keńesiniń VII otyrysy ótti, dep habarlaıdy QazAqparat QR Ekologııa, geologııa jáne tabıǵı resýrstar mınıstrliginiń Telegram kanalyna silteme jasap.

Qatysýshylar Keńestiń jańa tóraǵasyn saılady, ol QR Ekologııa, geologııa jáne tabıǵı resýrstar mınıstri Maǵzum Myrzaǵalıev boldy.

Otyrysqa TMD Memleketaralyq ekologııalyq keńesine múshe memleketterdiń ókilderi qatysty.

Olar: Armenııa Respýblıkasy, Belarýs Respýblıkasy, Qazaqstan Respýblıkasy, Qyrǵyz Respýblıkasy, Moldova Respýblıkasy, Reseı Federatsııasy, Tájikstan Respýblıkasy, Ózbekstan Respýblıkasy. Sondaı - aq TMD – ǵa múshe memleketterdiń Parlamentaralyq Assambleıasy Keńesi Hatshylyǵynyń ókilderi, TMD Elektr energetıkalyq Keńesiniń Atqarýshy komıteti jáne Táýelsiz Memleketter Dostastyǵynyń Atqarýshy komıtetiniń ókilderi qatysty.

Otyrys barysynda qatysýshy elder qorshaǵan ortany qorǵaý salasyndaǵy yntymaqtastyqtyń jaı-kúıi men damý perspektıvalary máselelerin talqylady. Sondaı-aq, polımerlik qaptamany paıdalanýdan ekologııalyq qaýipsiz qaptamany paıdalanýǵa kezeń-kezeńimen kóshý, parnıktik gazdar shyǵaryndylaryn satý júıesi, TMD aýmaǵynda qorshaǵan ortany qorǵaý salasyndaǵy Turaqty damý maqsattaryn iske asyrý jáne balyq sharýashylyǵyn damytý salasynda tájirıbe almasty.

Qazaqstan parnıktik gazdar shyǵaryndylaryn saýdalaý júıesiniń tájirıbesimen bólisti. QR jańa ekologııalyq kodeksiniń sheńberinde Parıj kelisimi mindettemeleriniń oryndalýyn qamtamasyz etý maqsatynda parnıktik gazdar shyǵaryndylary men sińirýleri salasy jetildirildi. Osylaısha, 2021 jyldan bastap kómirtegi bıýdjeti jyl saıyn 1990 jylǵy kómirtegi bıýdjetiniń deńgeıinen 1,5% - ǵa qysqaratyn bolady.

Sondaı-aq, qazaqstandyq tarap qorshaǵan ortany qorǵaý salasyndaǵy Turaqty damý maqsattaryn engizý tájirıbesimen almasý nátıjeleri jáne balyq sharýashylyǵyn damytý salasyndaǵy yntymaqtastyq týraly habarlady.

Aıta ketsek, Qazaqstannyń aýqymdy balyq sharýashylyǵy qory bar. Sala mamandary men sarapshylardyń baǵalaýy boıynsha balyq sharýashylyǵyndaǵy óndiris áleýeti jylyna 600 myń tonna balyqqa deıin baǵalanady.

Keńes barysynda múshe memleketter qorshaǵan ortany qorǵaý salasyndaǵy ózekti máseleler boıynsha yntymaqtastyqty jalǵastyrýǵa ýaǵdalasty.

Otyrys qorytyndysy boıynsha 2022–2023 jyldarǵa arnalǵan TMD-ǵa qatysýshy memleketterdiń Memleketaralyq ekologııalyq keńesiniń jumys jospary bekitildi, otyrystyń hattamasyna qol qoıyldy.