Maǵzum Myrzaǵalıev tabıǵatty qorlaýshylarmen qalaı kúrespek
«Ókinishke qaraı, sońǵy aptada biz tabıǵatqa qatigezdik tanytqan birneshe jaıtqa kýá boldyq. Bul - barshamyzǵa belgili Aqtaýdaǵy ıtbalyqty uryp-soǵý, Býrabaıda úıilip jatqan qoqys, Almaty mańynda Pervomaıda jaıqalyp óskene Qyzyl kitapqa engen lotosty julyp alyp, jelige jarııalaý, sondaı-aq biregeı Kóbeıtuz kólinen tuz urlap, satý faktileri. Bul - tek bizge belgili bolǵan jaıttar», - dedi Maǵzum Myrzaǵalıev OKQ-da ótken baspasóz máslıhatynda.
Mınıstrdiń aıtýynsha, bul máselemen kúresýdiń tásili bar.
«Birinshi, bul - ekologııalyq bilim berý. Biz halyqtyń ekologııalyq oı-sanasyn ózgertip, ózimiz úlgi bolyp, balalardy tabıǵatqa uqypty qaraýdy úıretýimiz kerek. Mysaly, sol qoqysty ózimen birge alyp ketý, ásirese ony órtemeý, balalardy ósimdikter men janýarlardy kútýge úıretý, ıaǵnı ózimiz tabıǵat qorǵaý qyzmetine belsene qatysýymyz kerek. Aǵash otyrǵyzyp, jan-janýarlardy barynsha qorǵaýymyz qajet. Osynyń bári balalyq shaqtan bastalady. Sondyqtan da, Memleket basshysy Bilim mınıstrligine mektepte balalarǵa ekologııalyq bilim beretin jańa pán engizýdi tapsyrdy. Bul jóninde Prezıdent Qasym-Jomart Kemeluly búgin tańerteń óziniń Twitter akkaýntynda habarlady», - dedi ol.
Mınıstrdiń aıtýynsha, ekinshi ádis - aıyppul salý.
«Sońǵy kúnderi týrıster legi kóbeıgenin baıqaımyz. Biraq, olar barǵan jerinde kóp qoqys qaldyryp jatyr. Bizge jıi qoqys salatyn ydys ornatý týraly usynys aıtyldy. Biraq, tájirıbe kórsetkendeı, biz neǵurlym kóp bak qoısaq, soǵurlym azamattar kóp qoqys shashady. Osyǵan oraı, biz aıyppul salýǵa májbúrmiz. Biz ishki ister mınıstirligimen birge osy máseleni pysyqtadyq. Osy demalys kúnderinen bastap jaǵdaıdy monıtorıngteý jáne birden, jergilikti jerde shara qabyldaý úshin ulttyq parkter men demalys aımaqtary boıynsha reıd júrgizemiz. Qoqys tastaýshylarǵa aıyppul salamyz! Reıdterge bizben birge ekologtar, qoǵam belsendileri men eriktiler shyǵady», - dedi ol.
