Maǵzum Myrzaǵalıev sý mamandar týraly: Bul saladan adamdar kóptep ketip jatyr

NUR-SULTAN. QazAqparat – Qazaqstanda sý sharýashylyǵy salasyndaǵy mamandardyń tapshylyǵy máselesi qalaı sheshilmek? Bul suraqqa QR Ekologııa, geologııa jáne tabıǵı resýrstar mınıstri Maǵzum Myrzaǵalıev jaýap berdi, dep habarlaıdy QazAqparat tilshisi.

«Kadrmen qamtamasyz etý máselesine bólek toqtalǵym keledi. Ókinishke qaraı, sońǵy jyldary sý mamandary bul saladan kóptep ketip jatyr. 2020 jyly bizdiń bastamamyzben atalǵan salany kadrmen qamtý maqsatynda M.H.Dýlatı atyndaǵy Taraz memlekettik ýnıversıteti janynan sý sharýashylyǵy ınstıtýty ashyldy. Sondaı-aq, bıyl sý sharýashylyǵy mamandarynyń biliktiligin arttyrý maqsatynda 2 ortalyq ashyldy. Birinshisi, SQO-da, ekinshisi Almaty qalasynda», - dedi M. Myrzaǵalıev.

Mınıstrdiń aıtýynsha, bıyl atalǵan ortalyqtar arqyly 800 mamannyń bilimin jetildirý kózdelip otyr. Odan bólek, 15 jas mamannan turatyn kadrlyq rezerv qurylǵan.

Buǵan deıin M. Myrzaǵalıev elimizde apatty jaǵdaıdaǵy sý qoımalarynyń jóndeýden ótip jatqany týraly aıtty.