Maǵzum Myrzaǵalıev Sharyn shatqalynyń týrıstik bolashaǵy týraly pikir bildirdi

NUR-SULTAN. QazAqparat – Ekologııa, geologııa jáne tabıǵı resrýrstar mınıstri Maǵzum Myrzaǵalıevtiń el aldyndaǵy eseptik kezdesýi kezinde Sharyn shatqalyndaǵy qaıǵyly oqıǵa týraly suraq qoıyldy, dep habarlaıdy QazAqparat tilshisi.

«Almaty oblysynda ekologııalyq týrzımdi damytýdyń birneshe jobasy talqylanyp jatqanyn bilip otyrmyz. Sonyń ishinde Sharyn shatqaly da bar. Ol jerde bir aıda eki ret sel júrip, biri qaıǵyly oqıǵamen aıaqtaldy. Qazir Sharyn shatqaly tartymdy týrıstik aýmaqtan ólim qaýpi bar nysanǵa aınalyp otyr. Mınıstrlik qolǵa alyp otyrǵan ınvestıtsııalyq jobadan nege bas tartpaıdy», - dep surady saýal ıesi.

Maǵzum Myrzaǵalıev jaýabynda Sharyn shatqalyndaǵy seldiń yqtımal jolyna eshkim nysan salýdy josparlamaǵanyn eskertti.

«Sharyndaǵy ınfraqurlymyǵa keletin bolsaq, eger muqııat zerttegen bolsańyz, jobalanyp otyrǵan vızıt ortalyq pen etnoaýyl, saýda dúrgirshekteri men ózge nysandar shatqaldyń ishine salynǵaly jatqan joq. Bul nysandar ústińgi alańda salynady. Ol jerde qazir avtokólik turaǵy tur», - edi mınıstr.

Sondaı-aq, ol atalmysh joba boıynsha qoǵamdyq tyńdaý ótetinin, barlyq eskertpelerdi sol jerde aıtyp, túsiniksiz suraqtarǵa sol jerde jaýap alýǵa boltanyn túsindirdi.

«Bul másele boıynsha qoǵamdyq tyńdaý bolady. Sol kezde osy máselelerdi qaraýǵa bolady», - dep qaıyrdy Maǵzum Myrzaǵalıev.

Eseptik kezdesý barysynda vedomstvo basshysy memleket basshysynyń tapsyrmasy boıynsha mınıstrlik ekologııalyq týrızmdi damytýǵa kúsh salyp jatqanyn ataǵan bolatyn. Atap aıtsaq, Almaty oblysynyń 4 iri ulttyq parkinde birneshe ınvestıtsııalyq jobalardy iske asyrý kózdelgen. Ár joba boıynsha ınvestorlar bekitilgen kórinedi. Olar:

- «Kólsaı kólderi» memlekettik ulttyq tabıǵı parki boıynsha – «Atyraý-Rent» JShS»;

- «Sharyn» memlekettik ulttyq tabıǵı parki boıynsha - QazaqGeography respýblıkalyq qoǵamdyq birlestigi

- «Altyn Emel» memlekettik ulttyq tabıǵı parki boıynsha – QazaqGeografy respýblıkalyq qoǵamdyq birlestigi

- «Іle-Alataý» memlekettik ulttyq tabıǵı parki boıynsha – «Týranga Grýpp» JShS.

«Almaty óńiriniń ulttyq parkteri boıynsha 11 zamanaýı vızıt-ortalyq, 5 eko-qonaq úı, 28 glempıng, 8 Kempıng, 4 etno-aýyl salý kózdelip otyr. Osy nysandarǵa jalpy kólemi 31,5 mlrd teńge jeke ınvestıtsııa tartylady. Ulttyq parkterdiń rekreatsııalyq júktemesiniń normalaryn eskersek, týrısterdiń kútiletin aǵyny 2 mln adam bolmaq.

Qazirgi tańda 3 memlekettik ulttyq tabıǵı parkte qajetti ınfraqurylymnyń qurylysy bastaldy. «Іle-Alataý» ulttyq parkinde «Aıýsaı» vızıt-ortalyǵy ashyldy. Vızıt-ortalyqtyń aınalasynda soqpaqtar tazartylyp, týrısterge yńǵaıly bolý úshin ózenge kópir tóseldi. Volonterler eko-mádenıet boıynsha oqytý júrgizýde», - dedi mınıstr eseptik kezdesýde.