Maǵzum Myrzaǵalıev Prezıdentke Jańaózendegi ahýaldy baıandady
«Men qazir Memleket basshysyna Jańaózendegi ahýalǵa qatysty da baıandadym. Biz eki apta buryn Aqtaý qalasynda «QazMunaıGazdyń» ókildigin arnaıy ashqan edik. Bul keńseniń negizi baǵyty men maqsaty - halyqpen jumys isteý, halyqtyń, sonymen qatar kásiporyndardyń saýaldaryn qarastyrý, óndiristik kórsetkishterdi kúsheıtý. Ókinishke oraı, jyl basynan beri Ózen ken ornyndaǵy munaı óndirý kólemi josparly kórsetkishterden kem bolyp otyr. ıAǵnı, bizdiń kún saıyn óndirý kólemimiz 1 000-1 200 tonnaǵa tómen. Sondyqtan osy baǵytta jumysty kúsheıte bastadyq», - dedi Maǵzum Myrzaǵalıev Prezıdent qabyldaýynan keıin.
Sonymen qatar ol Memleket basshysyna munaı-gaz hımııasy keshenin damytý jaıynda jetkizgenin aıtty.
«Tamyzdyń 20-syna qaraı Atyraý qalasyndaǵy iri polıpropılen shyǵaratyn zaýyt ashylady. Qazirgi ýaqytta sońǵy jumystary júrgizilýde. Bul zaýyt ashylǵannan keıin 500-den astam jańa jumys orny qurylady. Bul osy óńirdegi eń iri zaýyttardyń biri sanalady. Onyń óndiristik qýaty jylyna 500 myń tonna propılendi quraıdy», - dedi ol.
Maǵzum Myrzaǵalıevtiń atap ótýinshe, «QazMunaıGaz» qazirgi ýaqytta eki jobamen aınalysyp jatyr.
«Birinshisi - polıetılen shyǵaratyn zaýyt. Bul zaýyttyń jyldyq qýaty 1 mln 250 myń tonna polıetılendi quraıdy. Ol da Atyraý qalasynda ornalasqan. Ekinshi joba - býtadıen shyǵaratyy zaýyt. Bul joba da kompanııanyń strategııalyq seriktesterimen pysyqtalyp jatyr», - dedi kompanııa basshysy.
Foto: akorda.kz
