Maǵzum Myrzaǵalıev: Qorshaǵan ortany ońaltý úshin ulttyq deńgeıde sharalar qajet

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Málik Myrzaǵalıev eldegi ekologııalyq máselelerdi retteýde jergilikti atqarýshy organdardyń jumysy tıisti nátıje bermeı otyrǵanyn málim etti, dep habarlaıdy QazAqparat tilshisi.

«Qazirgi ýaqytta elimizdiń 3,5 myń polıgonynda 120 mln tonnadan astam turmystyq qatty qaldyqtar jınaqtalǵan. Jyl saıyn 5 mln tonnadan astam turmystyq qaldyq qalyptasady. 2016 jyldan bastap turmystyq qaldyqtardy óńdeý 2,6 paıyzdan 11,5 paıyzǵa deıin, al ónerkásiptik qaldyqtardy óńdeý úlesiniń 26,8 paıyzdan 32,2 paıyzǵa deıin óskeni baıqalady. 2019 jyldan bastap plastmassany, karton men qaǵaz qaldyqtaryn, shynyny kómýge tyıym salyndy. Alaıda óńirlerde tıisti ınfraqurylym bolmaǵandyqtan, iske qosylǵan mehanızm jetkilikti dárejede júzege asyrylmaı otyr», - dedi Maǵzum Myrzaǵalıev Úkimet otyrysynda.

Onyń aıtýyna qaraǵanda, atmosferalyq aýanyń sapasy, jerústi sýlarynyń lastanýy, kárizdik tazartý keshenderiniń tozýy nemese bolmaýy, turmystyq qaldyqtar polıgondarynyń bolmaýy, nashar jaı-kúıi boıynsha problema barshylyq.

«Jergilikti atqarýshy organdar ekologııalyq jaǵdaıdy jaqsartý boıynsha keshendi sharalardy qabyldaý arqyly atalǵan problemalardy sheshýge tyrysady. Degenmen, respýblıkanyń qorshaǵan ortasyn jaqsartý úshin ulttyq deńgeıde sharalar qajet», - dedi Maǵzum Myrzaǵalıev.