Maǵzum Myrzaǵalıev: Kóbeıtuzdyń sýy men tuzy densaýlyqqa zııan

NUR-SULTAN. QazAqparat – Ekologııa, geologııa jáne tabıǵı resýrstar mınıstri Maǵzum Myrzaǵalıev qazaqstandyqtarǵa Kóbeıtuzǵa barmaýǵa keńes berdi, dep habarlaıdy QazAqparat tilshisi.

«Kóbeıtuz týraly naqty mynany aıta alamyn. Birinshiden, byltyr ákimdik sý men tuzǵa taldaý jasady, odan jaǵymsyz qorytyndy shyqqan. Ondaǵy sý men tuzdyń quramynda metaldar óte kóp ekeni málim bolyp otyr. Men osy alańdy paıdalanyp, turǵyndardan Kóbeıtuzǵa barýdan tartynýdy suraǵym keledi», - degen mınıstr atalmysh kóldi erekshe qorǵalatyn aýmaqqa aınaldyrý jergilikti ákimdikke baılanysty ekenin eskertti.

«Erekshe qorǵalatyn aýmaqqa aınaldyrý máselesine kelsek, bul – jergilikti atqarýshy organnyń quzyryndaǵy sharýa. Biz ony jergilikti rejımdegi erekshe qorǵalatyn aýmaqqa aınaldyrýdy usynǵan bolatynbyz. Laboratorııalyq zertteýlerdiń qorytyndysyn alyp otyrmyz. Ákimdik qazir bul máseleni sońyna deıin zerttep bitiredi. Aldaǵy 1-2 kúnde oblys ákimdigimen sóılesip, naqty málimet alatynymdy aıtqym keledi», - dedi Maǵzum Myrzaǵalıev.

Sonymen qatar, vedomstvo basshysy Kóbeıtuzdyń sýy men tuzy adam aǵzasyna qaýip tóndirýi múmkin degen boljam aıtty.

«Kóbeıtuzǵa byltyr aýdan ákimdigi kordon qoıǵan. Odan ári qaraı kólikpen ótýge bolmaıdy. Ekinshiden, taǵy qaıtalap aıtamyn, kólge barý adamdardyń densaýlyǵyna keri áser etýi múmkin», - dedi Maǵzum Myrzaǵalıev.