Maǵzum Myrzaǵalıev Qazaqstandaǵy basty ekologııalyq máselelerdi atady

NUR-SULTAN. QazAqparat – QR Ekologııa, geologııa jáne tabıǵı resýrstar mınıstri Maǵzum Myrzaǵalıev Dúnıejúzilik qorshaǵan ortany qorǵaý kúni qarsańynda ekovolonterlermen, ekologııalyq fakýltetterdiń stýdentterimen kezdesti, dep habarlaıdy QazAqparat tilshisi.

«Erteń bizdiń kásibı merekemiz – Dúnıejúzilik qorshaǵan orta kúni atalyp ótedi. Bul bizdiń merekemiz ǵana emes, qorshaǵan ortany qorǵaýǵa úlken úles qosyp júrgenderge ortaq kún. 5 maýsymnyń da kezdeısoq tańdalmaǵanyn atap ótkim keledi. 1972 jyly 5 maýsymda Stokgolm konferentsııasy óz jumysyn bastaǵan edi. Ondaǵy negizgi máselelerdiń biri – qorshaǵan ortany qorǵaý salasyndaǵy halyqaralyq saıasatty ázirleý boldy. Osyǵan baılanysty BUU Bas Assambleıasy 5 maýsymdy qorshaǵan orta kúni dep belgileıtin qarar qabyldady. Bul qararda ekologııalyq problemalar, qorshaǵan ortany tazartýǵa shaqyrý týraly kóp aıtylady», - dedi Ekologııa mınıstri Halyqaralyq jasyl tehnologııalar jáne ınvestıtsııalyq jobalar ortalyǵynda ótken jastarmen kezdesýde.

Jyl saıyn Dúnıejúzilik qorshaǵan ortany qorǵaý kúniniń arnaıy taqyryby men urany belgilenedi. Bıylǵy taqyryp – «Qaıta qarastyrý, qaıta qurý jáne qalpyna keltirý» bolmaq. Mınıstrdiń aıtýynsha, biz de qazir qaıta qarastyrý kezeńinde turmyz.

«Sońǵy jyldary taza aýa, qorshaǵan ortany qorǵaý taqyrybyna beı-jaı qaramaıtyn qarapaıym azamattardyń ekologııa taqyrybyn belsendi kóterip júrgenderi bizdi qatty qýantady. Pandemııa kezinde planeta biraz demaldy, bul bizge tabıǵattyń róli men adamnyń ornyn qaıta qarastyrýymyz keregin kórsetedi», - dedi Maǵzum Myrzaǵalıev.

Kezdesý barysynda mınıstr eldegi basa mán berilýi qajet eki mańyzdy problemany atap ótti.

«Taza aýa jáne qaldyqtardyń az óńdelýi máseleleri ózekti bolyp otyr. Bizdiń aınalamyzda ushyp júrgen paketter, lastanǵan saıabaqtar óte kóp. Biz de qazir belgili bir qaıta mán berýge, qaıta qarastyrýǵa kele jatyrmyz. Taǵy bir úshinshi másele – klımattyń ózgerýi de óte kóp áser etedi. Ortalyq Azııa óńiri jahandyq klımattyq ózgeristerge, jahandyq temperatýranyń kóterilýine anaǵurlym beıim bolady. Sońǵy 100 jylda Qazaqstanda temperatýra 1,37 gradýsqa kóterilgen. Ókinishke qaraı sońǵy jyldary temperatýranyń joǵarylaý úrdisi jyldam júrýde. Biz úshin bul – kúrdeli syn-qater. Bizdiń aýmaq shóleıttenýge, jerdiń tozýyna tez ushyraıdy. Sý resýrstarynyń bolýy da asa mańyzdy. Bizdegi barlyq sýdyń jartysyna jýyǵy syrttan keledi. Osylaısha, barlyq klımattyq ózgerister sýdyń qoljetimdi bolýyna áser etedi», - dep túıindedi Maǵzum Myrzaǵalıev.